Anih duh broă Làng bol càr Dăk Lăk pa ai lơh jăt Sră sồr sồ 12032 bè broă rơndăp tăp sèng, rơndăp wơl mpồl lơh broă ală anih lơh broă gơwèt Anih duh broă Làng bol càr, Anih duh broă Làng bol kấp kơnhoàl nàng lơh geh dùl mpồl atbồ dà lơgar pràn, geh cồng nha, di pal mờ jơnau kờñ lơh tam gơl pa wơl sră nggal gơnoar ătbồ tàm tơngai pa.

Jăt mờ hơ̆, càr rơ̆p bơyai lơh tơrgùm bal mờ tơmŭt bal ờ uă sở, gah lơh broă, mơkung lơh tam gơl pa wơl mpồl lơh broă tàm dơlam is nàng tơrmù ƀà mpồl lơh broă, tơnguh uă bơta niam tàm broă atbồ. Mùl màl: Sở Broă rơndăp lơh mờ Bơcri priă mờ Sở Priă jền geh tơrgùm bal gơs Sở Lơh sa - Priă jền. Sở Phan geh is mờ Tiah ơm kis mờ Sở Broă lơh sa sươn sre mờ Bơtàu tơnguh Ƀòn lơgar rơ̆p tơrgùm bal gơs Sở Broă lơh sa sươn sre mờ Tiah ơm kis. Sở Bơ̆t bơtàu mờ Sở Gùng lòt Jun Pơn diang rơ̆p tơrgùm bal gơs Sở Bơ̆t bơtàu mờ Gùng lòt. Sở Broă dơlam is mờ Sở Lơh broă, Cau ling sồt să mờ Mpồl bơtiàn rơ̆p geh tơrgùm bal gơs Sở Broă dơlam is mờ Lơh broă. Sở Khoa họk Kông nghệ mờ Sở Thông tin mờ Truyền thông rơ̆p tơrgùm bal gơs Sở Khoa họk Kông nghệ mờ Truyền thông. Bơdìh hơ̆ tai, càr Dăk Lăk kung rơ̆p bơyai lơh tơrgùm bal Anih pờ tơlik jơnau đơs mờ Sơnio rùp bal mờ Ƀăo Dăk Lăk gơs Anih Yal tơngit càr Dăk Lăk dê, dong kờl uă ngan jơh ală bơta pràn yal tơngit mờ tơnguh uă cồng nha broă mblàng yal. Tơnơ̆ mờ tŭ ală sở geh tơrgùm bal mờ tơn jơh lơh broă, càr Dăk Lăk rơ̆p tơrmù geh ờ uă ngan là bơh 09 sở, dong kờl tơrmù mpồl lơh broă sră nggal gơnoar ătbồ, tơrmù ƀà ală mpồl lơh broă bal mờ tơnguh cồng nha broă atbồ dà lơgar dê.