Tàm dơ̆ lơh broă, Mpồl lòt sền tơrgùm cri bơyai bè broă mblàng yal, bơto bơtê bơta git wă ngui internet lơngăp lơngai ai kơnòm dềt in; broă pơgồp bal đah hìu nhă, hìu bơsram mờ gơnoar atbồ sàh sơnah ƀòn tàm broă atbồ, jăt sền kơnòm dềt tàm tiah internet; broă dờp, bơsong ală broă gơlik geh gơrềng tus mờ kơnòm dềt tàm internet.

Jăt jơnau yal, tơngai bơh nam 2021 tus tŭ do, càr Dăk Lăk neh bơyai lơh pờ 27 ơdŭ bơto mờ gơnoar kơnòm dềt, rơcang tam dră mờ tam lơh, pù pờng, sơgràm aniai kơnòm dềt mờ bơta git wă sền gàr kơnòm dềt tàm bơta internet. Uă broă lơh yal tơngit, mblàng yal geh lơh tàm hìu bơsram, mpồl bơtiàn ƀòn ơm kis mờ tàm ală anih lơh broă yal tơngit. Ală anih lơh broă geh gơnoar tàm càr Dăk Lăk neh dờp, pơgồp bal bơsong rơlao 150 nă kơnòm dềt gơtìp sơgràm aniai, geh bơh broă gơlik geh jơnau tam lơh tàm internet, pơrgon tìp măt nàng bơsong jơnau tam lah ha là tơlik clip tam lơh tàm internet, mìng gơrềng tus mờ kơnòm bơsram kấp bàr.