Anih duh broă Làng bol càr Dăk Lăk neh geh Jơnau sồr sồ 25 nam 2026 nàng sồr gah Bơto bơtê mờ Bơsram bal mờ ală sàh, sơnah ƀòn tơnguh broă lòt sền, jăt sền broă tă ală khà priă tàm hìu bơsram; lơh glài nền nòn ală cau lơi dờp priă tìs mờ jơnau geh ai. Ală khà priă rề pal di cau, di jơnau kờñ, di mờ jơnau geh ai mờ geh loh làng nàng cau mè bèp kơnòm bơsram, kơnòm bơsram in git mờ jăt sền.

Tàm bơta càr Dăk Lăk pa rơndăp tăp sèng, broă bơyai lơh wơl mpồl hìu bơsram. Gùt càr tŭ do gam 625 hìu bơsram dà lơgar lơh tơnơ̆ mờ tŭ tơrmù rơlao 600 hìu bơsram. Broă kơl jăp broă lơh, gàr tơl bơta bơto bơsram pal lòt bal mờ atbồ nền nòn priă jền hìu bơsram, pleh lời gơlik geh ală khà priă rề bồ nam lơh gơtìp kal ke tus mờ mè bèp kơnòm bơsram.

Sờh Bơto bơtê mờ Bơsram càr Dăk Lăk kung sồr ală hìu bơsram lơh jăt tơl broă dong kờl kơnòm bơsram, tàm hơ̆ uă ngan là kơnòm bơsram geh rài kis gơtìp kal ke, kơnòm bơsram tàm tiah làng bol jơi bơtiàn ờ gal cau; bañ lời broă tă priă bồ nam bơsram gơs bơta kal ke gơwèt mờ ală hìu nhă dê. Bal mờ hơ̆, Sờh ai loh làng sồ điện thoại nàng dờp jơnau yal bơh làng bol dê. Do geh sền là dùl tàm ală gah broă nàng di tŭ gŏ, lơh niam wơl ală bơta tơngŏ tìs tàm broă lơh jăt ală khà priă rề tàm hìu bơsram.

Mò Lê Thị Thanh Xuân, Kwang Lam bồ Sờh Bơto bơtê mờ Bơsram càr Dăk Lăk pà git, gah do neh di tŭ ai ngui ală sră nggal bơto sồr atbồ priă jền, phan bơna, jào tơnơ̆ mờ tŭ rơndăp tăp sèng mờ ală khà priă tă bồ nam bơsram. Sờh Bơto bơtê mờ Bơsram càr Dăk Lăk sồr ală hìu bơsram lơh jăt jơnau geh ai bơh tàm bồ nam bơsram tơn; di lah geh cau tìs den rơ̆p sền, lơh niam wơl mờ lơh glài di jăt mờ jơnau neh geh ai. “Ală tơngu me gơrềng bal tus mờ khà priă rề bồ nam bơsram den bol añ kung neh bơto sồr ală hìu bơsram bơyai lơh nền nòn. Ală khà priă tă bồ nam bơsram kung di tŭ geh sră nggal nàng lơh niam wơl, gàr niam ờ lơh geh ală bơta gơlik geh gơrềng bal tus mờ broă sơgràm rề, ală broă lơh kal ke bè đah priă jền, kal ke gơrềng tus mờ kơnòm bơsram”.