Nam 1996, bi Xuin lơh lài ai tờm kơphê rê tam tàm bă ù mìr, ala ai broă lơh tam phan ờs mờng bơh yau tùc tam tơngời, kòi, rơpual nhồng. Ală nam sơnrờp, tài ờ hềt gĭt sơngka sền gàr, kơphê lơh geh ờ gŏ geh uă. Ờ gŏ dil nùs, bi lòt jòi, lùp bơsram, tus bal ală ơdŭ bơsram tàp jak chài măy mŏk, lòt còp ală broă lơh tơrlòng lài tam kơphê nàng lơh jăt tàm sươn mìr…Kơnờm bè hơ̆, bơh 300 tờm kơphê bơh chờm, tus tŭ do, bi Xuin neh rề ơnàng bă ù gơguh tus 5 lồ kơphê, pah nam lơh geh rlau 20 tấn kơphê gar.

Ờ mìng lơh sa jak lơm, bi Xuin gam jơh nùs tus bal lơh broă tàm ƀòn lơgar. Bơh dùl nă Bí thư Chi đoàn jơh nùs jơh tồr, bi geh tơmŭt Đảng. Nam 2010, mờ bơngă bal mờ kơnòl bơh he dê, bi geh làng bol pin dờn pồ lơh Lam bồ thôn, tơnơ̆ hơ̆ geh pồ lơh Bí thư Chi bộ thôn Kdăng. Bi Xuin sùm kơlôi tus broă lơh broă sa jŏ jòng bơh làng bol dê:

“Tŭ añ lơh lam bồ thôn, uă hìu tus hờ hìu àñ dan mờ añ kĭ ƀà sră pơ àr tăc ù, añ ờ gŏ kĭ. Mờ mìng pà khi in gŏ bàr pe nă cau ƀòn ndai geh uă ù, tăc rơhời, lồi dŭt lòt lơh broă apah wơl ai cau in, kis sơrlèt ngai gời. Làng bol he mìng lơh broă sa, kis kơnờm tàm lơh sa, ờ gŏ gĭt kă bro. Tăc ù den ai bơta lơi nàng sa, ai bơta lơi nàng klàs rƀah. Bè añ lài do kung rƀah ngan, ờ geh ù nàng lơh sa, pal lơh ngan lơh, tềm pềr, blơi tai ù, lùp bơsram, tus bal bơsram tàp bè broă chài sơngka sền gàr chi tam den hơ̆ sồng geh bè ngai do”.

Gàr geh ù, mơya lơh bè lơi nàng làng bol in geh priă bơh ù taih? Bal mờ priă dong kờl bơh Anih priă jền Dong kờl cau rƀah dê, bi Xuin gam lùp mờ ală kông ty kơphê tàm ƀòn lơgar, dong làng bol lơh bal mờ tơngguh uă cồng nha tam phan.

Là đảng viên, cau lơh broă sa jak kâp càr, bi Xuin neh tam pà mờng chài, dong kờl uă hìu bơnhă kal ke brồ guh klàs rƀah. Bi Kyăh, ơm tàm ƀòn Kdăng, pà gĭt:

“Kơnờm geh Đảng, Dà lơgar sền gròi dong kờl ai añ in kơnrồ deh kòn, lơh pà añ in dùl nơm hìu. Geh anih ơm kơ̆ kơl jăp, hìu bơnhă lơh ngan ròng siam sền gàr kơnrồ, lơh sa mờ geh bi Xuin bơto broă tam, sơngka sền gàr kơphê den tàng hìu bơnhă añ hơ̆ sồng lik klàs geh bơta rƀah. Nam do kung lơh ngan lơh geh hìu pa do”.

Ồng Đan, Chủ tịch Anih duh broă Mặt trận Dà lơgar Việt Nam sàh Kdang, càr Gia Lai pà gĭt: bi Xuin là dùl nă đảng viên pơnrơ ngan tàm ƀòn lơgar. Tơnơ̆ tŭ tơmŭt bal thôn, bi pơn jăt tai lơh broă tàm Jơnum sền gàr lơngăp lơngai, rơndăp tăp sèng tàm kâp hơđơm.

 “Tŭ bi Xuin kơ̆ nùs ờ bài kĭ khăt dùl bơta sră pơ àr lơi ai làng bol in tăc ù, uă cau gơjrañ mơya tŭ do khi gŏ gơlơh là pal ưn ngài wơl bi uă ngan. Bi ờ gŏ ngòt kal ke, sùm jơh nùs mờ broă lơh, lơh geh bơta pin dờn tàm làng bol, pơgồp bơnah kwơmàng ai jơnau lơh nền Đảng dê, gùng dà broă lơh bơh Dà lơgar dê gơ lòt mŭt tàm rài kis. Bè lơh sa den bi là dùl tàm ală hìu lơh sa jak ngan rlau jơh ƀòn”.

Tŭ do, uă hìu bơnhă làng bol kòn cau Bahnar tàm ƀòn Kdăng neh geh ală sươn kơphê gơ ai priă lơh geh bơh 400 tus 500 tơlak đong pah nam; uă hìu bơnhă lơh geh hìu đam niam tre. Gơ wèt mờ bi Xuin, gàr ù ờ mìng là gàr jơtài lơh sa mờ gam là gàr broă lơh broă sa jŏ jòng ai làng bol in. Jơnau bơh cau đảng viên do dê kung pà gŏ, tŭ kwang bàng rềp làng bol, wă làng bol mờ khin kong kơnòl, jơnau lơh nền Đảng dê, gùng dà broă lơh bơh Dà lơgar dê rơ̆p geh lơh loh làng bơh ală tam gơl bơh ƀòn tơn.