Tàm dơ̆ pơrjum do, Anih duh broă Lơh kơnòl broă sùm Quốc hội rơ̆p pơn jat tai sền sơwì, tă pơgồp jơnau đơs tàm uă rơndăp broă lơh adat mờ Jơnau lơh nền tàm pơrjum. Tàm dơ̆ pơrjum do, Anih duh broă Lơh kơnòl broă sùm Quốc hội sền sơwì, ring bal ală jơnau rcang cih Jơnau lơh nền tàm pơrjum, bè: Jơnau lơh nền tàm pơrjum bè Broă lơh lơh adat nam 2027; Jơnau lơh nền tàm pơrjum cih bè broă ală anih lơh broă lùp sền geh tă dùl bơnah bơh ală bơnah priă ai wơl, gĭt gŏ bơh lùp sền tơnơ̆ tŭ tong tàm kes priă Dà lơgar nàng tă ngui ai broă lơh mờ tơnguh uă bơta pràn jak bơh anih lơh broă lùp sền dê; Jơnau lơh nền tàm pơrjum cih bè broă sền gàr Kwang lam bồ dơ̆ cah rơña.

Bè broă lơh jat sền, Anih duh broă Lơh kơnòl broă sùm Quốc hội rơ̆p lơh dơ̆ tă pơgồp jơnau đơs bè jơnau yal broă lơh nam 2026, kờp dŭ Broă rơndăp lơh sền sơ wì dơ̆ tă ngui nam 2027 bơh Kiểm toán dà lơgar; sền sơwì jơnau yal broă lơh  làng bol lơh is bơh Quốc hội dê nhai 8 nam 2026. Bè lơh nền ală broă kwơ màng, Anih duh broă Lơh kơnòl broă sùm Quốc hội rơ̆p tă pơgồp jơnau đơs bè Ală jơnau neh lơh nền Broă lơh jơnau kờñ dà lơgar rcang lài, dră mờ cau lơh tìs tơngai bơh nam  2026 -2030, sền sơnơng tus nam 2035.