Tàm ală sàh tiah nhàr lơgar hơ đang ù gờl Ia Rvê, Ea Bung, Buôn Đôn mờ Ia Lốp, càr Dăk Lăk, kwang bàng kấp hơđơm, kra ƀòn, cau geh bơngă pin dờn, kwang bàng thôn, ƀòn mờ Mpồl ling sền gàr tiah nhàr lơgar geh sền gĭt jơnau gĭt wă bè jơnau yal lơh broă mờ lơgar ndai, gơnoar tờm kơnhoàl ù tiah, lơngăp lơngai tiah nhàr lơgar dà  lơgar; mơkung rcang bơta chài mblàng yal jơnau mờ lơngăp lơngai internet.

Ală cau lơh broă mblàng yal jơnau bơto pơlam bơta chài yal, bơsong jơnau yal, sền sơwì jơnau cih mblàng yal jơnau; sền gĭt, bơsong jơnau yal tìs, jơnau yal ờ ngan tàm internet. Broă ngui bồ tơngoh jak kòn bơnus lơh gơlik mờ măi mok sồ kung geh yal tơngĭt, dong mpồl mblàng yal jơnau tàm kấp hơđơm in rcang lài rlau tai tàm broă dờp mờ mblàng yal jơnau.

Bi Nguyễn Thị Thi, ơm tàm thôn 4, sàh Ea Bung pà gĭt, ală jơnau bơsram, bơta chài do gơtùi ngui tơn tàm broă lơh mblàng yal jơnau tàm thôn, ƀòn. “Bơh tàm pơrjum, să tờm añ wă loh bè kơnòl bơh tơl nă làng bol dê tàm broă sền gàr lơngăp lơgai, sền gàr gơnoar tờm tiah nhàr lơgar; mơkung gĭt broă dờp, tam pà jơnau yal tờm mờ ờ iăt jat ală jơnau yal ờ hềt geh sền sơwì. Tơnơ̆ do, tŭ rê tàm thôn, añ rơ̆p tàm bơrlŭ bal tàm ală dơ̆ pơrjum mpồl, ală dơ̆ pơrjum thôn, cribơyai tơn mờ làng bol mờ hòi jà cau tàm mpồl lơh jat niam adat boh lam, jơh nùs tus bal sền gàr lơngăp lơngai, rơndăp tăp sèng mờ gơnoar tờm tiah nhàr lơgar dê”.

Bal mờ hơ̆, ală dơ̆ pơrjum kung lơh geh ală bơta nàng làng bol tiah nhàr lơgar in gĭt mờ jơnau yal di bè broă tiah nhàr lơgar mờ ală gùng dà broă lơh geh gơrềng. Ồng Lê Đình Quý, Phó Chủ tịch Anih duh broă Làng bol sàh Ia Rvê, càr Dăk Lăk, pà gĭt: “Do là dơ̆ nàng làng bol in gĭt mờ jơnau yal di, jơnau yal tờm bè boă tiah nhàr lơgar, gĭt gơ̆p lơh bơyô bal, lơh broă bal đah Việt Nam mờ Campuchia kung bè ală gùng dà broă lơh geh gơrềng tus ù tiah nhàr lơgar dê. Bơh hơ̆, làng bol tơnguh bơta gĭt wă, nùs nhơm geh kơnòl tàm broă sền gàr gơnoar tờm dà lơgar, jơh nùs tus bal sền gàr rơndăp tăp sèng, bơt bơtàu bơta tam klăc bal, lơh bơyô bal đah làng bol 2 gah tiah nhàr lơgar dê”.

Ồng Nguyễn Quốc Hiệp, Phó Kwang lam bồ Sờh Niam chài, Tàp pràn să jan mờ Lòt nhơl càr Dăk Lăk sền dờp, internet gam gơ gơs dùl gah yal tơngĭt jơnau sùm bơh làng bol dê. Den tàng, bal mờ ai jơnau yal tơngĭt tờm tus tàm ƀòn lơgar, broă rcang bơta chài sền gĭt jơnau yal tìs, jơnau ờ ngan kung geh sền gĭt là dùl tơngume kwơ màng. Nam do, mờ broă pờ ơnàng cau mờ broă lơh mblàng yal, broă lơh yal jơnau lơh broă mờ lơgar ndai geh yal tus rềp rlau mờ kwang bàng mờ làng bol tàm tiah nhàr lơgar dê: “Bol añ lam lơh uă tus mờ kwang bàng thôn, ƀòn, cau kra ƀòn, lam bồ ƀòn, mpồl kwang bàng, công chức tờm tàm kấp hơđơm dê, is ồn là tiah nhàr lơgar. Bơh dơ̆ pơrjum, bol añ tơnguh uă bơta gĭt wă bơh kwang bàng, ală anih lơh broă chính trị mờ làng bol tàm tiah nhàr lơgar; yal jơnau, mblàng yal ală bơta ƀuơn, bơta pràn, ală broă lơh nàng sền gàr gơnoar tờm tiah nhàr lơgar kung bè rcang gàr lài dră wơl mờ jơnau ờ niam tàm internet tŭ do dê”.

Broă yal jơnau yal di rê tus tơn tàm ƀòn lơgar, mơkung tơnguh bơta chài bơsong jơnau yal tơngĭt ai mpồl mblàng yal jơnau, kra ƀòn, cau geh bơngă pin dờn mờ kwang bàng thôn, ƀòn geh kơ̆p kơnờm lơh geh tai dùl gah tàm tơrbŏ bal đah gơnoar atbồ, mpồl geh gơnoar mờ làng bol. Bơh hơ̆, làng bol tiah nhàr lơgar geh tai ală bơta nàng gĭt, sền sơwì jơnau yal, tơnguh uă bơta gĭt wă rcang ngăc mờ rcang lài tus bal sền gàr lơngăp lơngai, rơndăp tăp sèng, sền gàr gơnoar tờm kơnhoàl ù tiah, bơt bơtàu gùng nhàr lơgar ring lơngai mờ lơh bơyô bal.