Mpồl ling sền gàr tiah nhàr lơgar càr Dăk Lăk mờ Hìu bơsram ơm sa bĭc tơn kấp 1 mờ kấp 2 Ia Lốp rơ̆p pơgồp bal rlau 5 mpồl kơnòl broă, tàm hơ̆ Mpồl ling sền gàr tiah nhàr lơgar lơh jat niam gơnoar lòt bal mờ hìu bơsram tàm bơto bơtê adat boh lam, bơta chài kis, bơto pơlam broă lơh, bơyai lơh srơh mờ sền gròi kơnòm bơsram geh rài kis kal ke.

Pal sền gròi, ală broă lơh sền gròi kơnòm bơsram pơn jat tai geh gàr niam, tàm hơ̆ geh “Dong kờl oh lòt bơsram - Kòn ròng pôs đồng Ling sền gàr tiah nhàr lơgar”, dờp dong kờl kơnòm bơsram rƀah, jàu priă bơsram, dong kờl kham sơm kòp, pà sơnơm mờ phan bơna măi mok, phan ngui bơsram sră ai kơnòm bơsram jơi bơtiàn dồ ết nă cau ơm sa bĭc tơn tàm hìu bơsram geh rài kis kal ke uă. Đại tá ồng Rơ Lan Ngân, Phó Chính ủy Mpồl đơng lam Mpồl ling sền gàr tiah nhàr lơgar càr Dăk Lăk pà gĭt, broă lơh oh mi lơh geh tai broă lơh nàng mpồl ling sền gàr tiah nhàr lơgar in pơgồp bal sùm, niam mờ hìu bơsram tàm bơto bơtê mờ sền gròi kơnòm bơsram tiah nhàr lơgar. Bơh hơ̆ pơgồp bơnah tơnguh uă cồng nha bơto bơtê, tề lam bơta gĭt wă adat boh lam, geh kơnòl sền gàr gơnoar tờm tiah nhàr lơgar mờ bơt bơtàu ù tiah nhàr lơgar kơ̆ pràn.