Càr Dăk Lăk tŭ do geh di pơgăp 10 rơbô nă cau ơm kis, bơsram, lơh broă tàm 29 lơgar mờ kơnhoàl ù tiah. Tàm 5 nam do, làng bol kis tàm lơgar bơdìh mờ cau pròc mhàm cau kis tàm lơgar bơdìh neh tă rơlao 140 tơlăk dolar Mỹ nàng bơ̆t bơtàu mờ bơtàu tơnguh ƀòn lơgar, tus bal ală broă lơh rài kis broă lơh broă sa mpồl bơtiàn, kis git jơnau git adăt tàm ală ƀòn, pơgồp bal tàm broă bơtàu tơnguh lơh sa mpồl bơtiàn càr Dăk Lăk dê.

Ồng Nguyễn Tuấn Hà, Phó Củ tịc Duh broă sùm Anih duh broă Làng bol càr Dăk Lăk đơs nền, càr tŭ lơi kung rơcang iăt ală jơnau đơs, jơnau pơgồp bal bơh làng bol, mpồl lơh sa kă bro bal mờ làng bol kis tàm lơgar bơdìh dê; ai geh bơta ƀuơn nàng làng bol kis tàm lơgar bơdìh bal mờ cau pròc mhàm pơn jăt tai pơgồp bal bơ̆t bơtàu ƀòn lơgar ngai sơlơ bơtàu tơnguh. Tàm broă lơh, tàm nùs nhơm đềt mềr, ram mhŭ, ală cau càr Dăk Lăk kis tàm lơgar bơdìh bal mờ cau pròc mhàm neh tam pà bal ală jơnau chờ hờp tềng đăp mờ ală tam gơl pràn kơl dang ƀòn lơgar, dà lơgar dê.