Tàm tơngai bơh nam 2021 tus 2024, càr Dăk Lăk neh ai 35,7% khà tă priă tàm kes priă càr dê ai broă bơto bơtê, bơsram mờ bơto broă lơh mờ rơlao 28 rơbô 300 tơmàn đong. Mơya, khà cau lơh broă neh geh bơto broă lơh geh sră dờp mờ cau lơh broă geh bơta chài gam ờ uă. Ồng Nguyễn Bá Thành, Củ tịc Mpồl duh broă atbồ mờ kung là Kwang lam bồ dờng Kông ty Kổ phần Tào sơdàng 333 Dăk Lăk yal, tŭ do kông ty gam lơh pràn broă lơh mờ măi mok ală gah lơh broă, mơya ờ tơl uă ngan cau jăk, cau git lơh broă den tàng kông ty pal bơto is jăt broă lơh “at tê sơn-io broă”.

Bŭ lah geh 75% khà cau lơh broă tàm kông ty neh geh sră dờp, mơya cau jăk chài lơh broă, tàm hơ̆ uă ngan là ală tiah lơh broă kờñ geh jơnau git wă pa mờ bồ tơngoh tam gơl pa bơceh lơh… den gam ờ tơl uă ngan. Ồng Nguyễn Bá Thành yal: “Măi mok pa ndrờm là ờ hềt geh broă bơto bè gah tào sơdàng mờ bol añ rơcang bơto tơn tàm cau lơh broă.Cau chài lơh bơto cau ờ chài in. Cau lài bơto cau tơnơ̆ in nàng lơh broă. Di lah hìu măi pơyoa nàng lòt bơsram tàm dùl mpồl lơh broă ndai ờ di broă lơh den kung ờ gơtùi sơl, ờ bơsong geh broă lơh tàm broă lơh bol añ dê”.

Jăt Tiến sìh ồng Nguyễn Thanh Trúc, Lam bồ Hìu bơsram Đại họk Tây Nguyên đơs, broă ờ tơl cau lơh broă geh bơta chài uă ai Tây Nguyên in tŭ do, geh ală gơkòl mờ ờ hềt geh jơnau bơsong bơh tàm broă bơto cau lơh broă. Mùl màl, tàm khà 35 gah broă geh bơto đại họk tàm hìu bơsram do, geh uă gah broă di pal krơi is ngan bơh tiah do dê, geh bơta niam bè broă lơh mờ priă geh tơnơ̆ do tŭ neh jơh bơsram, mơya ờ geh bơta niam nàng cau bơsram dan cih măt mŭt bơsram: “Mpồl gah lơh sa suơn sre brê bơnơm rơwah cau mŭt bơsram ờ uă ngan, bè nam 2024 mìng geh rơlao 50%. Mơya tàm jơnau yal priă geh bơh lơh broă cau bơsram dờng tơnơ̆ mờ tŭ neh jơh bơsram đơs bal cau bơsram dờng mpồl gah lơh sa suơn sre geh priă nhai uă rơlao mờ ală mpồl gah bơsram ndai, mơya ală cau bơsram dờng ờ bài rơwah gah do nàng bơsram. Den tàng kung gam geh bơta ờ ndrờm bal bè jơnau kờñ tàm mpồl bơtiàn dê”.

Tàm Tây Nguyên, càr Dăk Lăk là càr gal làng bol ngan, mờ rơlao 2 tơlăk nă, mơya bơta chài cau lơh broă gam là bơta ờ pràn. Jăt ồng Nguyễn Thiên Văn, Phó Củ tịc Anih duh broă làng bol càr Dăk Lăk đơs, khà cau lơh broă neh geh bơto broă lơh, geh sră dờp neh bơsram broă lơh tàm càr do mìng rơ̆p geh di pơgăp 1 bơnah 5. Pal kah ngan, càr ờ hềt geh cau lơh broă chài tàm ală gah broă kờñ măi mok pa, lơh sa sồ, lơh sa mờ măi mok lơh is. Bơta do lơh gơrềng tơn tus mờ cồng nha lơh broă bal mờ bơta pràn tàm pơrlòng bơh lơh sa càr dê: “Càr Dăk Lăk tŭ do ờ hềt geh uă mpồl lơh sa kă bro lơh broă dờng, mìng geh dềt mờ dềt ngan, den tàng kung gơrềng tus mờ broă bơto broă lơh. Ngan là tàm do geh ală gah broă geh pơgồp bal tơn mờ broă lơh, mơya bơta pràn mpồl lơh sa kă bro hơ̆ pal pờ ơnàng mờ bơtàu tơnguh broă lơh den hơ̆ dờng geh dờp cau lơh broă gơtùi”.

Jăt mpồl kwang bàng jăt sền tus bơh Anih duh broă Niam chài Mpồl bơtiàn bơh Quốk hội dê, càr Dăk Lăk geh bơta pràn uă, mơya càr pal geh dùl broă lơh pràn jŏ jòng, ndrờm bal bal mờ mùl màl rơlao bè bơtàu tơnguh cau lơh broă, tàm hơ̆ is ồn ngan là broă hòi jà cau lơh broă jăk chài, tàm hơ̆ uă ngan là cau jơi bơtiàn ờ gal cau. Mờ pal tơnguh broă pơgồp bal đah hìu bơsram, mpồl lơh sa kă bro bal mờ gơnoar atbồ nàng lơh geh bơta niam cau lơh broă, bơto cau lơh broă pơgồp bal mờ ngui cau lơh broă, dong kờl cau bơsram gơtùi lơh broă tơn tàm ƀòn lơgar. Ồng Đinh Công Sỹ, Phó Kwang atbồ Anih duh broă Niam chài mpồl bơtiàn Quốk hội dê đơs là, broă do sơlơ gơs jal mhar rơlao, tŭ broă tơrgùm bal càr, sàh, sơrbì kấp kơnhoàl neh mŭt tàm tơngai dŭt ndơl.

Dùl càr Dăk Lăk pa dờng ơnàng rơlao mờ git nđờ rơhiang sàh gơwèt càr dê, den tàng sơlơ pal geh mpồl cau lơh broă gơdờp ngan: “Tus do, ù tiah dờng ơnàng bè hơ̆, den tàng he pal geh lơh wơl bè đah gùng dà broă lơh bơh ală gah broă bơto, bơta dờng ơnàng ù tiah mờ càr kung pal geh rơcang lài nàng geh gùng dà broă lơh tàm tơngai tus. Dơ̆ bàr là sền gròi bè broă pơlam broă lơh nàng hòi jà mŭt tàm ală gah mpồl lơh sa kă bro gam geh jơnau kờñ uă bè lơh sa suơn sre, brê bơnơm dê”.

Bơtàu tơnguh cau lơh broă, tàm hơ̆ uă ngan là cau lơh broă jăk chài, ờ mìng là jơnau kờñ tềng đăp măt mờ gam là bơta tờm ai broă bơtàu tơnguh kơl jăp càr Dăk Lăk dê tàm tơnơ̆ do. Mìng tŭ cau lơh broă geh bơtàu tơngjh di mờ gùng dà broă lơh, hơ̆ sồng càr geh ngui uă ngan bơta geh, bơta kwơ mờ brồ guh pràn kơl dang tàm broă tam gơl pa mờ tơrgùm bal.