Pơrjum lơh tềl bơta bơtàu tơnguh pa bơh càr Dăk Lăk dê tơnơ̆ tơmut bal, mờ kung lơh gơlik ù tiah bơtàu tơnguh mờ broă rơndap lơh jŏ tơngai, lơh gơlik bơnàng jă gơ hòi gơ jà ală bơnah priă jền bơcri. Tàm rơndap ù tiah pa, càr Dăk Lăk tơlik jơnau kờñ gơ gơs là gah gơguh lơh sa bơh tiah kềng gah dà lềng đah jum tàm gùl lơgar mờ Tây Nguyên dê, bơtàu tơnguh jat gùng dà tơlir, pa mờ kơ̆ kơljap jŏ jòng sùm.

Jak chài măi mok, tam gơl pa bơceh lơh, tam gơl sồ mờ lơh sa dà lềng geh càr Dăk Lăk git nền là ală bơta gơn kơnờm gơguh lơh sa pa. Ù tiah bơtàu tơnguh pa geh lam lơh jat broă lơh 3 tiah bơtàu tơnguh, 3 gùng kềng lơh sa mờ 2 tiah tờm gơn kơnờm. Tàm hơ̆, tiah Buôn Ma Thuột pơn jat tai geh gơnoar broă lơh tờm bơtàu tơnguh Tây Nguyên dê, ai tiah đah mat tơngai geh ai rơndap lài gơ gơs là gah gơguh lơh sa pa bè lơh sa mờ măi mok, logistics, anih ơhò ơm tàm dà lềng mờ lơh sa dà lềng, bơtàu tơnguh jat tàm lơh sa tơlir, lơh sa tàm pơdar, tam gơl pa bơceh lơh mờ tam gơl sồ. Pơn đơl lơh geh khà gơguh GRDP kờp bal tơngai bơh nam 2026 tus nam 2030 geh bơh 11% dùl nam rlau hơđang, tus nam 2030, priă lơh geh kờp bal dùl nă cau geh rlau 153 tơlak đong.

Tàm pơrjum, ồng Đỗ Hữu Huy, Chủ tịc Anih duh broă Làng bol càr Dăk Lăk đơs nền: “Jơnau kờñ gơguh lơh sa mhar, kơ̆ kơljap mìng gơtùi lơh geh tŭ jơh gùt anih lơh broă chính trị lòt bal mờ mpồl lơh sa kă bro, cau bơcri priă. Bơta mờ ală cau bơcri priă kơp kơnờm ờ mìng là broă rơndap lơh bơtàu tơnguh mờ gam là dùl gơnoar atbồ lơh broă loh làng, jơh nùs mờ lòt bal. Bè hơ̆ den tàng, bal mờ broă lơh sir rơndap ù tiah, bơcri priă lơh phan bơna mờ rơcang rề ơnàng bă ù, càr Dăk Lăk git nền tam gơl wơl sră pơ àr gơnoar atbồ, tam gơl anih bơcri priă kă bro là kơnòl broă tờm, cèng bơta tam gơl pràn, ai làng bol mờ mpồl lơh sa kă bro lơh Anih tờm drơng broă”.

Tàm pơrjum, càr Dăk Lăk kung yal mat ală gah ai lài gơ hòi gơ jà bơcri priă, tơrgùm tàm lơh sa suơn sre ngui măi mok pa mờ lơh gơlik jrô, lơh mờ măi mok lơh gơlik phan - crăp mòn phan, năng lượng lơh geh wơl, logistics mờ phan bơna bơt bơtàu. Anih duh broă Làng bol càr Dăk Lăk neh jàu jơnau lơh nền ring bal jơnau lơh nền bơcri priă ai 25 rơndap broă lơh in, mờ kờp jơh priă bơcri rlau 40 rbô 290 tơmàn đong. Càr kung kĭ sră cih kah lơh broă bal mờ 78 mpồl bơcri priă, geh kờp jơh priă bơcri cih tàm sră bơh chờm rlau 1 tơlak tơmàn đong.