Jat jơnau yal tàm pơrjum, kờp jơh phan bơna lơh geh 6 nhai bồ nam tàm càr Gia Lai kờp dŭ gơguh 8,21% pơndrờm dùl tŭ bal mờ nam 2025; tă priă dia dà lơgar lơh geh rlau 16 rơbô 566 tơmàn đong, gơguh rlau 22%.

Tiah bơcri priă, lơh sa kă bro pơn jat tai geh tam gơl niam mờ 165 rơndăp broă lơh cih mat dan bơcri priă lơh pa, uă rlau 2 dơ̆ pơndrờm dùl tŭ bal mờ nam lài; rlau 2 rơbô mpồl lơh sa kă bro geh tơnggơs mờ kờp jơh priă dan bơcri lơh mờr 30 rơbô tơmàn đong. Lòt nhơl kung cih dờp tềl tơngŏ niam tŭ wă pơgăp 8 tơlak 700 rơbô dơ̆ năc, priă lơh geh kờp dŭ 19 rơbô tơmàn đong. Tàm pơrjum, ồng Thái Đại Ngọc, Bí thư Tỉñ ủy càr Gia Lai sồr ală cau ala mat tơrgùm mblàng lơh loh di ngan cồng nha 6 nhai bồ nam, lơh loh ală bơta gam geh, bơta ờ niam mờ sền gĭt ală gùng dà broă lơh tờm nàng lơh sir jơnau kờñ gơguh tai lơh sa nam 2026 lơh geh 10,2%.