Tus tŭ do, Gia Lai neh lam lơh lơh geh tŭ tơngai 91 tàm 110 rơndăp broă lơh đèng mờ kờp jơh bơta pràn mờr 5 rơbô MW, ndrờm mờ mờr 90% bơta pràn geh tam pà. Tàm dơ̆ lơh broă, Anih duh broă Làng bol càr Gia Lai dan mờ Bộ Lơh sa mờ măi mok mờ Kă bro phan sền sơ wì tơnguh bơta pràn đèng càl mờ đèng mat tơngai di pal mờ bơta pràn bơh tiah do dê; gờñ ai lơh jat tơngume giă pờ đèng nam 2026; lơh  mhar bơcri priă lơh ală broă lơh bơt bơtàu gùng che ồs đèng pờ đèng; tă bơsong kòl yàn nàng 2 rơndăp broă lơh đèng càl Chơ Long mờ Yang Trung gờñ geh dờp ai mut ngui kă bro, mơkung geh broă lơh tơrmù ƀà broă tơrmù bơta pràn pờ đèng bơh ală hìu măi năng lượng lơh gơlik wơl.

 Đơs tàm dơ̆ lơh broă, đơng lam bồ Bộ Lơh sa mờ măi mok mờ Kă bro phan jờng rơ uă ngan cồng nha lam lơh Rơndăp ù tiah đèng VIII bơh Gia Lai dê. Mơkung sồr càr pơn jat tai kờp sền ală rơndăp broă lơh, lơh mhar lơh sir sră pơ àr bơcri priă lơh, ai mat ù, pơgồp bal niam mờ ală mpồl lơh broă bơh Bộ mờ gah đèng dê nàng tă bơsong di tŭ ală kal ke, gàr niam tŭ tơngai mut lơh ală rơndăp broă lơh pờ đèng mờ gùng che ồs đèng jat rơndăp ù tiah, pơgồp bơnah gàr niam lơngăp lơngai năng lượng dà lơgar dê.