Tàm rơndăp broă lơh Hìu bơsram jơi bơtiàn ơm sa bĭc tơn kấp dùl mờ kấp 2 Sa Loong, sàh Sa Loong, gĭt nđờ rơhiang nă cau lơh phan geh tam pà gơs uă mpồl, dơ̆ lĕ bal lam lơh ală bơnah broă. Tàm ală ròt hìu bơsram, cau lơh phan lơh sir bơnah rơkàng hìu; đah đơm, ală mpồl cau sơng dà gơ jal ngan lơh sir ală kơlik hìu dŭt ndơl. Tàm ală cơldŭ bơsram, ală mpồng, đèng sòl àng, pơng gàr, ntùng mờ ală phan bơna măi mok gam geh crăp ring bal.

Mpồl mut lơh rơndăp broă lơh do gam lam lơh 5 mpồl hìu bơsram, 1 mpồl hìu bơsram drơng broă sră pơ àr, 1 mpồl lơh niam wơl bal mờ ală bơnah broă ndai. Jat broă rơndăp lơh, 5 mpồl hìu bơsram rơ̆p tàm jàu lài mờ ngai 30/7; mpồl hìu drơng broă sră pơ àr lơh sir lài mờ ngai 10/8; hìu tàp pràn să jan mờ ală bơnah broă gam wơl kờp dŭ lơh sir bơh ngai 15 tus ngai 20/8.

Mìu jŏ jòng uă ngai lơh gơrềng tus tŭ tơngai mut lơh. Nàng bơsong broă do, cau dờp lơh broă dang toal tang glòm uă tiah, mơkung ntrờn tai mpồl lơh broă mut dong kờl. Tŭ do tiah lơh broă gàr niam pơgăp 220 nă cau lơh broă, lơh broă pơgăp 11 jiơ pah ngai. Ồng Nguyễn Văn Nhất, Phó Kwang lam bồ Sơnĕ 29/7, gơwèt Kông ty  dờng 319, Bộ Ling klàng, đơs nền, mpồl lơh broă sền gĭt do là kơnòl broă chính trị kwơ màng den tàng neh tơrgùm uă ngan rlau jơh mpồl cau, phan bơna măi mok nàng gàr niam tŭ tơngai mut lơh.

Ồng Nguyễn Văn Nhất, pà git tai: "10 ngai pa do, mìu uă ngan. Mpồl lơh broă neh sơnđờm lam lơh ală broă lơh bơsong, bè dang toal tang tàm jơh ală tiah tri sơmang. Gơwèt mờ tiah lă găc ƀlàng jơng, mpồl lơh broă neh mờ gam mut lơh 2 hìu toal tah, tơl hìu  pơgăp 60 thơk, nàng gơtùi mut lơh tàm ală bơta trồ mìu. Kờp dŭ tus ngai 15 nhai 8 rơ̆p lơh sir jơh mpồl hìu bơsram mờ mpồl hìu ơm kis ai kơnòm bơsram."

Tàm rơndăp broă lơh Hìu bơsram 2 kấp ơm sa sa bĭc tơn Kấp 1 mờ Kấp 2 Dục Nông, cau dờp lơh broă gam hòi jà bơh 250 tus 270 nă cau lơh phan mut lơh broă sùm 3 dơ̆ pah ngai. Jat broă rơndăp lơh, lài mờ ngai 31/7, rơ̆p tàm jàu 7 mpồl broă lơh bơt bơtàu geh 3 mpồl hìu bơsram kấp 2, 3 mpồl hìu bơsram kấp 1 mờ hìu drơng lơh sră pơ àr, ală bơnah broă ndai bè hìu sa sào, hìu ơm rơ̆p lơh sir lài mờ ngai 15/8.

Thượng tá ồng Vũ Thanh Khương, Bí thư Đảng ủy, Chủ tịch Mpồl duh broă Atbồ Kông ty pơgồp bal 319 tiah tàm gùl lơgar (gơwèt Kông ty dờng 319, Bộ Ling klàng) pà gĭt, bơnah sơn rờp bơh broă lơh dê neh lơh sir. Tŭ do ală mpồl mut lơh tơrgùm tàm broă lơh lơh sir bè sơng dà, tri, crăp mpồng, phan bơna măi mok, pơng gàr, rơndăp lòs, lă gac ntùng mờ ală bơnah broă măi mok. Thượng tá ồng Vũ Thanh Khương hơ gàr niam jơh bal tŭ tơngai mut lơh mờ bơta kơ̆ kơnhăp broă lơh dê: "Jơh nùs lơh ngan tàm jàu jơh broă lơh bơt bơtàu ai cau tờm bơcri lam mut ngui lài mờ nam bơsram pa do. Tŭ do, tàm tiah lơh broă, cau tờm lơh broă sùm hòi jà bơh 250 tus 270 cau lơh phan mut lơh 3 dơ̆, sùm tơnguh dơ̆ lơh broă. Mìng is dơ̆ lơh broă trồ mang, pah trồ mang geh bơh 50 tus 80 nă cau lơh phan lơh broă nàng pơnđơl pràn lơh ngan ai broă lơh bơt bơtàu lơh sir di mờ tŭ tơngai geh ai”.

Jat Mpồl atbồ rơndăp broă lơh bơcri priă đah mat tơngai mut Quảng Ngãi, 4 hìu bơsram tiah nhàr lơgar geh Rờ Kơi, Sa Loong, Dục Nông mờ Mô Rai ndrờm gam geh jat sền tŭ tơngai mut lơh pah ngai. Mpồl Atbồ ai kwang bàng măi mok lơh broă sùm tàm tơl tiah lơh broă nàng di tŭ tă bơsong kal ke, ngan là tàm ală bơta trồ tiah gơlik geh ờ niam.

Tus tŭ do, tiah hìu bơsram Rờ Kơi lơh geh pơgăp 90% mpồl broă, Dục Nông lơh geh 87%, Sa Loong lơh geh 82%, ai Mô Rai lơh geh pơgăp 68%, jơh ală gam cơnđòa mut tàm tơngai lơh sir. Ồng Võ Đại Tân, Kwang lam bồ Mpồl Atbồ rơndăp broă lơh bơcri priă đah mat tơngai mut Quảng Ngãi pà gĭt, jơnau kờñ là ai jơh 4 tiah hìu bơsram mut ngui ring bal lài mờ dơ̆ sơnđờm mut nam bơsram pa 2026 – 2027, pơgồp bơnah lơh jat geh cồng nha Jơnau lơh nền sồ 71 bơh Bộ Chính trị dê bè tam gơl pràn bơtàu tơnguh bơto bơtê mờ bơsram, hời rơ hời lơh lơyah rlau tai bè ală bơta bơsram sră đah tiah kal ke uă mờ ală tiah ndai. "Do là broă lơh bơt bơtàu ờ mìng pơn đơl pràn lơh sir lơm mờ sồr pal lơh sir  nàng gàr niam ală bơta bơto bơtê mờ bơsram ai ală sau in. Den tàng, bơta kơn jơ̆ bè tŭ tơngai là dờng ngan, ngan là tàm ală bơta trồ tiah kal ke. Mpồl Atbồ kung gam lơh ngan tus ngai 31/7 rơ̆p sền bal lơh sir ală bơnah broă bơt bơtàu, tìm sơlo. Tơnơ̆ hơ̆ pơn jat tai lơh pràn tŭ tơngai mut lơh nàng bàr pe tiah hìu bơsram in lơh sir lài mờ ngai 15/8. Jơh ală tiah hìu bơsram pal geh rcang lài tơl làm, gàr niam drơng broă nam bơsram pa jat jơnau sồr bơh Dà lơgar dê."