Pơrjum dơ̆ do, Mpồl Duh broă Dà lơgar rơ̆p sền sơ wì, lơh nền ală broă kwơ màng lam lơh Jơnau lơh nền tàm Pơrjum dờng dơ̆ XIV Đảng dê, tơngume bè bơt bơtàu Đảng, ală broă lơh chính trị mờ bơtàu tơnguh Dà lơgar tàm tơngai pa. Đơs sơnđờm mut pơrjum, ồng Tô Lâm, Tổng Bí thư, Chủ tịch lơgar đơs sùm, Pơrjum dờng dơ̆ XIV neh sền gĭt gùng dà broă lơh, jơnau kờñ mờ ală pơlam gùng dà broă lơh dờng; Pơrjum Dà lơgar dơ̆ 2 ơn bơnàng jă rơndăp broă mờ jơnau pal jat mut lơh ai tơngai lơh broă in.

Pơrjum Dà lơgar dơ̆ 3 pal ntrờn bơh ală pơlam gùng dà hơ̆ gơ gơs lơh nền gùng dà broă lơh tă bơsong bơta gơ kòl, bơsong bơta pràn mờ lơh geh bơta pràn jak bơtàu tơnguh pa. 13 tơngume cribơyai tàm Pơrjum gơwèt uă gah mơya bal mờ wèt tus jơnau kờñ uă rlau tai, lơh geh bơta pràn jak đơng lam, at gơnoar, atbồ, lơh broă, bơtàu tơnguh mờ sền gàr dà lơgar tàm tơngai pa. Tổng Bí thư, Chủ tịch lơgar sồr, Dà lơgar tơrgùm cribơyai jrô wơl tàm mpồl, tơngŏ loh làng nùs nhơm tàm jơrnum pơrjum, tă pơgồp jơnau đơs tơn tàm Jơnau rcang cih Jơnau lơh nền tàm pơrjum, Broă lơh, broă rơndăp lơh lơh broă; đơs pal lơyah niam, lòt song tàm broă lơh, loh jơnau kờñ đơs, loh gơtha jơnau đơs, loh jơnau đơs jơnau dan, loh gùng dà broă lơh rơwah; pơgồp bơnah tơn tàm lơh sir gùng dà lơh nền bơh Dà lơgar dê.