Đơs sơnđờm mut Pơrjum Dà lơgar 3 khoă XIV, ồng Tô Lâm, Tổng Bí thư, Chủ tịch lơgar đơs sùm jơnau kờñ ntrờn bơh rơndăp tăp sèng mpồl kwang bàng lơh broă tus tơnguh uă pràn jak đơng lam, at gơnoar mờ cồng nha lơh broă bơh Đảng dê mờ ală anih lơh broă chính trị dê. Jat Tổng Bí thư, Chủ tịch lơgar - tơrmù dipal mpồl kwang bàng lơh broă mìng là jơnau sồr, jơnau kờñ dŭt ndơl là Đảng đơng lam geh cồng nha rlau, Dà lơgar atbồ niam rlau, mpồl kwang bàng lơh broă mut lơh broă mhar rlau mờ làng bol geh drơng broă niam rlau tai.

Tơngume do neh dờp geh bơta sền gròi mờ dồ nùs bal bơh uă rơnàng làng bol mờ ală cau gĭt wă jrô, cau jak chài dê. Ồng Nguyễn Tiến Dĩnh, lài do là Thứ trưởng Bộ Broă dơlam is dờp, bè ồng Tô Lâm, Tổng Bí thư, Chủ tịch lơgar đơs sùm, broă rơndăp tăp sèng mpồl kwang bàng lơh broă tơngai pa do là dùl dơ̆ tam gơl bơta yau gơgơs bơta pa nàng kờñ tơrmù dipal ală anih lơh broă chính trị, bơsong bơta kal ke, tàm rơndăp rơndồl, tơrmù ală anih lơh broă ờ lơh broă tơn. Mơya, tơrmù dipal mpồl kwang bàng lơh broă mìng là jơnau sồr lơm; jơnau kờñ dŭt ndơl là bơt bơtàu dùl mpồl kwang bàng ngan ngồn pràn, bơta pràn lơh sir broă lơh, gơtùi lơh broă mờ geh cồng nha, tơnguh cồng nha atbồ dà lơgar mờ drơng broă làng bol ngai sơlơ niam rlau tai. Bơh hơ̆ nàng kờñ lơh geh bơta niam nùs bơh làng bol dê, ai làng bol lơh anih tờm tàm tơl broă lơh, kung bè jơnau lơh nền gùng dà broă lơh bơh Đảng mờ Dà lơgar dê. 

Jat ồng Nguyễn Tiến Dĩnh, rơndăp tăp sèng wơl mpồl kwang bàng lơh broă pơgồp bal mờ lam lơh broă lơh gơnoar atbồ ƀòn lơgar 2 kấp tơnơ̆ tŭ tơngai lam lơh, lơh jat neh lơh geh ală tam gơl niam ngan, mpồl kwang bàng lơh broă mut lơh broă tơrmù dipal uă rlau pơndrờm mờ lài do. Tơngai sơnrờp bulah gam geh ală kal ke, kòl yan- mơya tus tŭ do tơnơ̆ dùl nam lơh jat, mpồl kwang bàng lơh broă ală anih lơh broă chính trị tàm ală kấp sền bal hời rơ hời mut lơh broă bè ờs, lơh broă niam rlau, gàr niam jơnau sồr gơnoar atbồ rềp làng bol, wă wờng làng bol. Broă lơh atbồ dà lơgar, bơsong broă lơh ai làng bol mờ mpồl lơh sa kă bro in ngai sơlơ mhar ngan, geh cồng nha rlau; lơngăp lơngai chính trị, rơndăp tăp sèng lơngăp lơngai mpồl bơtiàn geh gàr kơ̆, lơh sa- mpồl bơtiàn pơn jat tai bơtàu tơnguh. Bơh sền sơwì lơh sa- mpồl bơtiàn bơh gùt lơgar dê ndrờm gơguh rlau pơndrờm dùl tŭ bal mờ nam lài- Do là ală cồng nha bơh sơn rờp đơs nền jơnau lơh nền rơndăp tăp sèng, tơrmù dipal mpồl kwang bàng lơh broă là di gùng.

Nàng pơn jat tai tơnguh uă pràn jak đơng lam, atbồ mờ cồng nha drơng broă làng bol, ồng Nguyễn Tiến Dĩnh đơs là, pal tơrgùm lơh sir kơrnoat boh lam bơt bơtàu rơndăp mpồl kwang bàng lơh broă, mơkung tơnguh uă cồng nha lơh broă mpồl kwang bàng, công chức dê, ngan là mpồl kwang bàng đơng lam bồ atbồ, kwang bàng đơng lam kấp broă lơh dờng màng. Bơdìh mờ bơta pràn jak tàm broă lơh ờs mờng, kwang bàng pal geh nùs nhơm drơng broă dà lơgar, nùs nhơm geh kơnòl mờ bơta gĭt wă drơng broă làng bol niam rlau tai. Ồng Nguyễn Tiến Dĩnh đơs loh jơnau đơs: “Nàng bơh gơnoar atbồ ƀòn lơgar 2 kấp mờ lơh broă niam rlau, bol he tàm tơngai tus rơ̆p pơn jat tai kờp sền wơl mờ tam pà kấp, is ồn là tam pà gơnoar dùl bă pràn rlau mờ di pal rlau, loh làng rlau. Kờp sền wơl nàng bol he in geh bơta rơndăp tăp sèng wơl rơndăp tăp sèng rơndăp mpồl kwang bàng lơh broă, ngan la ală rơndăp mpồl kwang bàng lơh broă ală anih lơh broă ờs mờng nàng gơtùi lơh geh jơnau sồr dê mờ is ồn là đơs sùm tơnguh uă cồng nha lơh broă bơh mpồl kwang bàng công chức tàm mpồl kwang bànglơh broă tŭ do dê".