Tiah lơh sa mờ măi mok Nam Pleiku gơwèt (sàh Bờ Ngoong, càr Gia Lai) geh Thủ tướng Cíñ phủ kĭ ai gùng dà bơcri priă bơh nhai 09 nam 2019. Rơndăp broă lơh do geh mờr 200 lồ, kờp jơh priă bơcri rơlao 500 tơmàn đong, geh Tập đoàn Kao su Việt Nam lơh tờm bơcri priă. Jơnau kờñ là lơh gơs tơngai sơnrờp tàm nam 2022 mờ lơh geh jơh bă ù tàm tiah lơh sa mờ măi mok tàm 5 nam. Mơya, tus tŭ do rơndăp broă lơh do kung gam ờ hềt gơtùi lơh broă tài gơkòl sră nggal, lơh wơl rơndăp ù tiah.

Tàm dơ̆ lòt sền mùl màl pa do, Ƀí thư Tỉñ ủy càr Gia Lai ồng Hồ Quốc Dũng neh sồr cau tờm bơcri priă pal lơh gơs broă tơlik dà ƀơ̆ mờ ală bơnah broă bơdìh tàm 4 nhai, mờ pơgồp bal nền nòn mờ ală sờh, gah lơh broă nàng lơh mhar broă lơh. Ồng Lê Trung Kiên, Kwang lam bồ dờng Kông ty TNHH MTV Kao su Chư Sê, do là mpồl lơh rơndăp broă do là git: “Tơnơ̆ mờ tŭ geh jơnau sồr bơh kwang đơng lam càr, kông ty neh dờp geh jơnau bơto sồr bơh Mpồl Atbồ Tiah lơh sa Gia Lai. Bol añ rơ̆p lơh ală broă lơh bơdìh, lơh wơl rơndăp broă bơcri priă di pal mờ jơnau geh ai tàm adăt boh lam, mờ pơn jăt tai sồr càr kĭ gùng dà broă bơcri priă mờ jal mhar lơh nàng ai rơndăp broă ngui lơh broă”.

Tàm sơnah ƀòn Pleiku, rơndăp broă lơh tiah drà niam CK54 geh sền là “Bo8ta tờm” nàng lơh geh bơta pràn bơtàu tơnguh tiah drà, mờ là bơta pràn kwơ màng ai gah lòt nhơl mờ broă lơh drơng ala in. Rơndăp broă lơh dờng tus 240 lồ ù, khà kờp làng bol kờp dŭ di pơgăp 17 rơbô nă, ai geh gùng dà bơtàu tơnguh gơs tiah drà lam lài mờ phan bơna pa, tơrgùm mờ uă bơta bè kă bro phan, bơto bơtê, lơh sơnơm, pơ-rài bồ tơngoh mờ tàp pràn să jan. Ồng Đặng Toàn Thắng, Củ tịc Anih duh broă Làng bol sơnah ƀòn Pleiku pà git, sơnah ƀòn do gam lơh ngan pơgồp bal mờ ală mpồl lơh broă gơrềng bal nàng lơh gơs jơh ală broă nàng di tŭ mŭt lơh di tàm Ngai sơn tờm lơgar mờr tus do: “Tiah drà niam CK54 geh mŭt lơh rơ̆p là bơta tờm ai tơngŏ, là bơta tờm pơgồp bal tàm broă lơh pràn bơtàu tơnguh lơh sa mpồl bơtiàn sơnah ƀòn dê. Geh uă bơnah broă, tàm hơ̆ geh pơnrơ ngan là ƀlàng golf 18 trồm, tiah kă bro phan, siêu thị blơi phan ơnàng mờr 5 lồ ù, ƀlàng nhơl dà, hìu năc ơm geh khà 5 sơrmañ, hìu pơrjum… Mờ ù tiah niam, trồ tiah ơm rơlô să niam, rơndăp broă lơh rơ̆p là anih hòi jà bơcri priă, lòt nhơl mờ lơh broă”.

Kung tàm dơ̆ lòt lơh broă pa do tàm ală sàh, sơnah ƀòn đah măt tơngai mŭt càr dê, Ƀí thư Tỉñ ủy mờ Củ tịc Anih duh broă Làng bol càr Gia Lai neh lòt sền mùl màl ờ uă rơndăp broă lơh dờng ndai bè ƀlàng golf Đăk Đoa, tiah lòt nhơl niam chài, tiah drà niam dòr nho Pleiku mờ mpồl hìu năc ơm, ƀlàng golf FLC tàm Đăk Đoa. Kwang đơng lam càr Gia La sồr pràn ngan ală sờh, ală sàh, sơnah ƀòn pal pơgồp bal lơh gơs sră nggal adăt boh lam nàng mŭt lơh wơl ală rơndăp broă lơh do. Broă càr Gia lai lơh ngan ai mŭt lơh wơl ală rơndăp broă lơh gam gơlời huĭ rơ̆p dong kờl lơh geh bơta pràn tàm tiah đah măt tơngai lik càr dê, lơh gơs ală tiah gơguh lơh sa pa mờ tơnguh uă cồng nha ngui ù mờ bơta pràn bơcri priă tàm ù tiah càr dê.