Ală ngai do, tiah lam lơh rơndap broă lơh tiah ơm kis pa Kiên Long, sàh Bình An, càr Gia Lai sùm nggồr măi mok, rơndeh rơndồ. Do là tiah ơm kis pa dờng ngan rlau jơh tàm 9 tiah drơng Rơndap broă lơh gùng rơndeh lòt mhar Quy Nhơn - Pleiku, ơnàng mờr 10 lồ.

Nàng di tŭ jàu tàm nhai 7 do tơn, bơh nhai 3 nam do, cau tờm lơh rơndap broă neh ai git nđờ jơt nơm măi mok, lam lơh broă sùm ngai mang. Ồng Nguyễn Trung Cần - ala mat cau tờm lơh rơndap broă pà git, tus tŭ do, khà broă bơt bơtàu lơh geh mờr 80%, lơh gơs ală bơnah broă geh sồr lơh lài nàng jàu 119 tàm  kờp jơh khà 250 bă ù ai ƀòn lơgar in: “Tŭ dờp ù geh tơl bơta nàng lam lơh rơndap broă, mpồl neh ai rlau 30 nơm rơndeh ơto jun pơndiang, 10 nơm măi tờ, 6 nơm măi cò, 6 nơm rơndeh pơnring bal mờ git nđờ rhiang nă cau lơh phan sùm lơh broă, kờp jơh bal trồ mang nàng lơh gơs rơndap broă lơh di mờ tŭ tơngai neh hơ pơrgon”.

Tàm 9 tiah ơm kis pa jat kềng gah gùng rơndeh lòt mhar, phan bơna ndrờm geh bơcri priă bơt bơtàu ndrờm bal mờ ală gơl gùng lòt, đèng sòl àng, ai pà dà, gùng che káp yal jơnau tơnggit mờ lơh niam dà tuh tơlik tàm ù, lơh gơlik muh mat pa, niam bơnĕ.

Klo yal cok khà nàng rơ wah bă ù, ồng Trần Văn Thông ơm tàm thôn Kiên Long, sàh Bình An chờ hờp ngan tài tiah ơm pa geh tơl ală bơta drơng rài kis in niam rlau: “Bă ù ơm kis pa tŭ lơi kung dùl êt rlau mơya khà pa den rơp pa rlau. Tàm do rềp gùng dà lơgar 19B, gùng lòt rê ƀuơn ƀuài rlau. Broă bơcri priă lơh dà sàng goh kung bè ală phan bơna bơt bơtàu gùt dar tiah ơm kis pa geh uă bơta niam rlau”.

Broă yal loh làng broă rơndap lơh tam pà bă ù, rơndap ai ơm kis pa bal mờ phan bơna bơt bơtàu ndrờm bal neh lơh geh bơta ring bal làng bol dê. Is ồn, tàm tơngai kơp tơrbŏ gùng ding dà sàng goh ngui bal, Anih duh broă Làng bol càr Gia Lai gam dong kờl priă nàng khoàng tơrlung dà ai mờr 150 hìu bơnhă làng bol in tàm 5 tiah ơm kis pa kuơmàng, dong làng bol iang nùs ntrờn tus tiah ơm kis pa. Ồng Thái Văn Điểm - Phó Lam bồ Cơldŭ Lơh sa sàh Bình An, càr Gia Lai pà git: “Mpồl atbồ rơndap rơndăp broă lơh sàh dê jà hìu bơnhă làng bol tus Anih duh broă Làng bol sàh Bình An lam lơh sra wac rùp tam pà ù tiah. Uă ngan làng bol chờ hờp tài dà lơgar neh bơcri lơh, sền gròi bơt bơtàu phan bơna ndrờm bal”.

Gùng rơndeh lòt mhar Quy Nhơn - Pleiku jòng mờr 125 kơi sồ, kờp jơh priă bơcri lơh rlau 43 rbô 700 tơmàn đong. Nàng drơng ai ù lơh rơndap broă, càr Gia Lai bơt bơtàu 9 tiah ơm kis pa tơrgùm bal, mờ 2 mpồl ơm kis pa pơgồp bal, rơndap ai anih ơm rlau 500 hìu bơnhă làng bol gơtìp gơ rềng in.

Tus tŭ do, jơh 9 tiah ơm kis pa ndrờm mut tàm tŭ tơngai lơh sir. Ồng Phạm Sĩ Duy Nhân - Mpồl atbồ ală broă lơh Gùng lòt mờ drơng rài kis làng bol càr Gia Lai pà git, uă tiah bè Trà Sơn, Thuận Đức, Trường Định 2 mờ Kiên Long neh lơh gơs ală bơnah broă sồr lơh lài, jàu ù nàng ƀòn lơgar in lam lơh cok khà, rơndap lơh ƀòn ơm kis pa: “Bè đah atbồ, bol hi sồr cau lơh broă lòt sền sùm tiah lơh rơndap broă, pơgồp bal mờ pơlam broă jat sền cau tờm lơh rơndap broă dê sồr tơnguh mhar tơngai lam lơh, lam lơh 3 dar 4 dơ̆ sùm, lơh broă jơh bal ngai mang nàng lơh mhar thàn tŭ tơngai hơ pơrgon. Tus tŭ do, tiah ai lài nàng rơndap làng bol in ơm kis sền bal neh lơh gơs mờ jàu sàh in tam pà ù, rơndap ù ơm làng bol in. Ală tiah gam wơl, Mpồl atbồ kung gam lơh ngan tơnguh mhar tơngai hơ pơrgon nàng lơh gơs tàm nhai 7 do”.

Broă lơh mhar lơh gơs ală tiah ơm kis pa jat kềng gah gùng rơndeh lòt mhar Quy Nhơn - Pleiku tàm Gia Lai ờ mìng dong làng bol gờñ gàr kơ̆ rài kis, mờ gam lơh gơlik bơta niam nàng rơndap broă lơh geh lam lơh di tŭ tơngai hơ pơrgon. Do rơp là bơta gơn kơnờm kuơmàng chồl tơnguh tàm tơrbŏ bal ală tiah, rề ơnàng ù tiah mờ lơh gơlik bơta gơn kơnờm bơtàu tơnguh lơh sa - mpồl bơtiàn ai ƀòn lơgar in.