Jăt jơnau yal, 6 nhai bồ nam, kờp jơh phan geh lơh tàm càr Khánh Hoà (GRDP) gơguh 9,03%, ơm dơ̆ 14 tàm 34 càr, ƀòn dờng mờ rơndăp ơm dơ̆ bàr tàm tiah jăt gah dà lềng Đah jum tàm Gùl lơgar mờ Tây Nguyên dê. Tăc tàm kes priă dà lơgar geh mờr 28 rơbô tơmàn đong, lơh gơs rơlao 80% broă rơndăp lơh tàm nam. Tiah bơcri priă pơn jăt tai geh gơguh, ală gah broă niam chài, mpồl bơtiàn, rài kis broă lơh broă sa geh sền gròi, sền gàr dà lơgar, lơngăp lơngai geh gàr kơ̆. Mơya, uă cau ala măt đơs là, bơdì mờ khà lơh geh niam kung gam geh ală bơta pal geh sền gròi song dơ pă nàng gàr gơguh lơh sa kơl jăp tàm ală nam tus.

Cau ala măt ồng Phan Gia Ngọc, Phó Kwang lam bồ Mpồl Jăt sền mờ Pơlam ală bơta bè adăt boh lam, Mpồl duh broă Làng bol càr Khánh Hoà mblàng: “Tă tàm kes priă nam do geh mờr 27 rơbô 930 tơmàn đong, mơya rơlao 14 rơbô tơmàn đong, geh rơlao 53%, tus bơh priă ngui ù mờ priă ơpah ù. Do là khà priă tă geh dùl dơ̆. Tàm tŭ hơ̆, khà priă tă geh bơh mpồl lơh sa kă bro dà lơgar bal mờ mpồl lơh sa kă bro bơdìh dà lơgar lơh den gơmù. Gơtùi đơs, lơh sa càr Khánh Hoà gam kơ̆p gơn tàm bă ù geh ngan ngồn ala mờ lơh geh bơta kwơ kơl jăp bơh broă lơh sa, kă bro”.

Jăt uă cau ala măt đơs, do là jơnau yal lài pal kah ngan tài khà priă geh bơh ù ờ gơtùi tơnjŏ. Kờñ geh sùm khà gơguh lơh sa uă, càr pal pơn jăt tai bơsong ală rơndăp broă gơtìp gơkòl, hòi jà ală rơndăp broă bơcri priă tus lơh broă geh cồng, bơtàu tơnguh pràn tiah mpồl lơh sa kă bro, lơh sa mờ măi mok, broă lơh drơng ala mờ lòt nhơl nàng ai geh priă kơl jăp, jŏ jòng tă tàm kes priă in. Ờ mìng sền gròi tus mờ broă geh uă priă, uă cau ala măt gam geh jơnau lùp bè broă tam pà priă nàng làng bol, tàm hơ̆ uă ngan là làng bol gơtìp gơrềng bơh ală rơndăp broă lơh geh dờp kwơ loh làng rơlao bơh cồng nha bơtàu tơnguh lơh sa dê. Ồng Võ Nam Thắng, Bí thư Đảng ủy sơnah ƀòn Đông Ninh Hoà, càr Khánh Hoà đơs là: “Pal tơnguh uă cồng nha priă geh, tă tàm kes priă, gàr priă tă ai rài kis broă lơh broă sa mpồl bơtiàn in, tàm hơ̆ uă ngan là dong kờl tam gơl broă lơh, bơcri priă tơnguh uă bơta niam lơh sơnơm, bơto bơtê tàm ƀòn lơgar. Cau tĕ khà kờñ ală cồng nha lơh sa do geh tam pà, pơgồp bal loh làng rơlao tàm ală gùng dà broă lơh rài kis lơh sa mpồl bơtiàn dê, ai làng bol in tơn, tàm hơ̆ uă ngan là ală cau gơtìp gơrềng tài bơh broă toh ù nàng bơtàu tơnguh broă lơh sa mờ măi mok, tiah drà”.

Bơdìh mờ jơnau kơ̆p gơn bè phan bơna mờ dơ̆ niam bơtàu tơnguh, làng bol kơ̆p kờñ priă geh bơh ù rơ̆p geh bơcri tai tàm hìu bơsram, hìu sơnơm, gùng lòt, bơtơ̆t rơbòng dà, bơto broă lơh, ai broă lơh mờ ală broă dong kờl rài kis broă lơh broă sa tơnơ̆ mờ tŭ toh ù, nàng cồng nhaa gơguh lơh sa geh lơh uă tus mpồl bơtiàn.

Anih duh broă Làng bol càr Khánh Hoà pà git tàm 6 nhai lồi nam, càr lơh ngan geh khà gơguh GRDP ờ uă ngan bơh 11,2%, bơh tŭ hơ̆ lơh gơs jơnau kờñ gơguh lơh sa gùt nam dê bơh 10 tus 11%. Nàng lơh geh ngan jơnau kờñ do, càr rơ̆p tơrgùm lơh mhar broă bơcri priă dà lơgar; bơsong ală rơndăp broă gam gơkòl; tơnguh cồng nha 4 bơta pràn gơguh lơh sa; tơnguh uă bơta niam pràn lơh broă gơnoar atbồ ƀòn lơgar bàr kấp; mờ ai lài bơta pràn lơh ală gùng dà broă lơh rài kis lơh sa mpồl bơtiàn bal mờ ală broă lơh geh kwơ. Ồng Châu Ngô Anh Nhân, Kwang lam bồ Sờh Priă jền càr Khánh Hoà pà git, càr rơcang tam pà priă gơguh bơh tàm kes priă nam 2025 mờ khà rơlao 10 rơbô tơmàn đong. Do là bơta pràn kwơ màng nàng gơguh lơh sa tàm ală nhai lồi nam dê. “Priă do rơ̆p geh tam pà ai jơh ală sàh, sơnah ƀòn nàng di pal mờ broă kờñ bơcri priă tàm ală gah broă geh kwơ. Càr ai lài bơcri priă ai broă bơto bơtê, lơh sơnơm drơng làng bol in; mờ tơrgùm khà priă ai ală broă lơh tờm, geh kwơ, tàm hơ̆ uă ngan là ală rơndăp broă lơh geh bơta pràn bơtàu tơnguh tiah đah Jum càr Khánh hoà dê”.

Ală cồng nha gơguh lơh sa niam tàm 6 nhai bồ nam là tơngu me tờm nàng càr Khánh Hoà lơh pràn. Mơya, nàng bơtàu tơnguh kơl jăp, càr pal tam gơl priă geh bơh ù tiah gơs priă geh jŏ jòng ai lơh sa, kă bro mờ gàr niam cồng nha gơguh lơh sa geh lơh uă mùl màl tus mờ rài kis làng bol dê.