Kờp tus ngai 20 nhai 2 nam 2025, gùt càr Kon Tum neh tơn jơh geh 627 hìu sèt, hìu ồm ñhăt dà mìu, tàm hơ̆ lơh pa 508 nơm hìu mờ lơh niam wơl 119 nơm hìu. Bè hơ̆ di lah pơn drờm mờ poh lài neh geh tai 105 hìu làng bol kis tàm càr Kon Tum geh tơn jơh hìu sèt, hìu ồm ñhăt dà mìu.

Mùl màl ală kơnhoàl tàm poh tơn jơh geh uă hìu sèt, hìu ồm ñhăt dà mìu, tàm hơ̆ geh kơnhoàl Đăk Glei 38 hìu mờ kơnhoàl Đăk Hà 31 hìu. Jơnau yal bơh Mpồl sồr lơh tơn jơh hìu sèt, hìu ồm ñhăt dà mìu Tỉñ ủy càr Kon Tum pà gŏ, gùt càr geh 2 rơbô 752 nơm hìu sèt, hìu ồm ñhăt dà mìu, tàm hơ̆ khà hìu kờñ lơh pa là 2 rơbô 186 nơm hìu mờ lơh niam wơl là 566 nơm hìu. Pe kơnhoàl tàm càr Kon Tum geh khà hìu sèt, hìu ồm ñhăt dà mìu jăt jơnau sồr lơh bơh Cíñ phủ dê, càr Kon Tum hòi jà bơta pràn bơh ală mpồl lơh broă, cau dùl nă să tàm càr mờ bơdìh càr, mờ pơgồp bal bơh ală priă lơh broă, rơndăp broă lơh nàng dong kờl làng bol tơn jơh hìu sèt, hìu ồm ñhăt dà mìu.