Lơh chờ ƀăo nam pa Ất Tỵ càr Kon Tum nam 2025 ràng tơlik rơlao 100 pang ƀăo nam pa bơh ală anih lơh broă sră ƀăo tàm càr mờ càr ndai. Tơl pang ƀăo cèng tus ală bơta niam krơi is bè broă tam gơl pa, brồ guh bơh dà lơgar dê bal mờ kơ̆p kờñ bè dơ̆ tam gơl sồ bơh sră ƀăo dê.

Bal mờ broă geh uă bơta bè tơngu me jơnau cih tàm tơl pang ƀăo, bơta niam ràng tơlik mờ sền ƀăo geh lơh niam, bơka tơngŏ niam ngan nam pa dê, hòi jà cau sền càr Kon Tum di tàm dơ̆ do. Cau lơh ƀăo, cau chài cih văn ồng Lê Văn Thiềng, mpồl cau lơh ƀăo dờng sơnam, Mpồl cau lơh ƀăo càr Kon Tum pà git: “Ală pang sră ƀăo ndrờm cih di gùng dà, di gùng dà broă lơh mờ ai ală jơnau tơngit pa ngan, yal jơnau sồr bơh kwang đơng lam Đảng, Dà lơgar dê, tàm hơ̆ uă ngan là bơh Tổng Ƀí thư ồng Tô Lâm dê. Jơh ală ndrờm ring bal mờ gùng dà broă lơh bơh Đảng. broă ràng tơlik niam, krơi is pơgồp bal mờ rài tam gơl sồ dê”. Tàm dơ̆ sơn đờm Lơh chờ sră ƀăo nam pa Ất Tỵ 2025, Mpồl cau lơh ƀăo càr Kon Tum pà Mpồl đơng lam ling sền gàr tiah nhàr lơgar ală pang ƀăo nam pa nàng pơyoa tus ală kwang bàng, cau ling tàm tiah nhàr lơgar in sền.