Jăt jơnau yal, 6 nhai do, lơh sa mpồl bơtiàn càr Lâm Đồng pơn jăt tai geh uă cồng nha niam, mơya kung gam ờ uă kal ke. Gơguh GRDP kờp dŭ geh mờr 8%, ờ tơl jăt mờ jơnau neh geh ai lài là rơlao 9,3%; tiah lơh sa mờ măi mok, bơ̆t bơtàu mờ broă lơh drơng ala gơguh ờ uă rơlao mờ jơnau geh ai.

Priă tăc phan mờ lơgar bơdìh gơmù pơn jăt mờ tŭ do nam lài; tă priă bơcri dà lơgar mìng rơ̆p geh mờr 14% broă rơndăp lơh; lơh niam sră nggal, tam gơl sồ tàm ờ uă tiah gam lơyài, ờ hềt ndrờm bal. Dar pơrjum tơrgùm sền wơl, cri bơyai mờ ring bal 24 jơnau lơh nền tàm pơrjum bè ală kơrnoăt boh lam, broă bơtàu tơnguh lơh sa mpồl bơtiàn, bơcri priă dà lơgar, tam pà priă, broă lơh mpồl bơtiàn mờ lơh broă bơh gơnoar atbồ ƀòn lơgar; mờ bơyai lơh broă kwang bàng jăt mờ gơnoăp gơnoar, lùp mờ hơ jơnau lùp gơwèt mờ ală gah broă geh cau tĕ khà bal mờ Làng bol sền gròi. Dar pơrjum geh bơyai lơh tus jơh ngai 02 nhai 7.