Pah drim ngai dơ̆ Pram, Anih tờm Drơng broă lơh sră nggal sàh Hàm Tân den gơs anih tìp măt đah gơnoar atbồ mờ làng bol. Bơdìh kơƀàng dờp sră nggal, ală ki dà ce, dà hùc, kơphe geh rơcang lài tơl nàng jà làng bol tàm tŭ kơ̆p lơh sră nggal ha là boh bơr mờ kwang đơng lam sàh. Tơnơ̆ mờ tŭ lơh jăt gơnoar atbồ ƀòn lơgar bàr kấp, sàh geh sùm broă lơh “Iăt mờ boh bơr mờ làng bol”, ai geh nùs nhơm niam bơnĕ nàng làng bol yal bè ală kal ke, gơkòl mờ geh iăt, mblàng yal tơn. Ồng Trần Quang Thanh, làng bol tàm sàh Hàm Tân, càr Lâm Đồng pà git: “Ală sră nggal gơrềng tus mờ ù tiah den ờ suk uă ngan, mơya kơnờm mờ ngai dơ̆ Pram wă làng bol, geh kwang đơng lam tàm do bơto sồr bol añ lơh ală broă nàng lơh gơs, mhar”.

Ngai dơ̆ pram cri bơyai tàm sàh Hàm Tân, càr Lâm Đồng, tŭ do neh gơs anih làng bol yal uă bơta, bơh sră nggal ù tiah, gùng lòt, broă lơh sa mpồl bơtiàn tus mờ ală gơkòl tàm broă lơh jăt sră nggal. Bơta geh dờp ờ mìng là nùs nhơm lơh broă boh kwang bàng sàh, broă dờp jơnau đơs geh lơh jăt nền nòn mờ ală jơnau hơ bơh sàh dê kung geh mùl màl, loh làng.

Tus tŭ do, Anih duh broă Làng bol sàh Hàm Tân neh geh sùm 16 dơ̆ cri bơyai, dờp geh rơlao 523 jơnau pơgồp bal, jơnau dan, bè ờs geh di pơgăp 20 jơnau pơgồp bal pah dơ̆ bơyai lơh. Bơh ală jơnau yal bè sră nggal, phan bơna gùng lòt, ù tiah tus mờ ală broă rài kis broă lơh broă sa làng bol dê, jơh ală ndrờm geh kwang đơng lam sàh iăt, tam cah is bơsong ha là jào anih lơh broă tờm bơ̆t bơtàu tơngai nàng bơsong. Jăt ồng Nguyễn Thành Nam, Phó Bí thư Đảng ủy, Chủ tịch Anih duh broă Làng bol sàh Hàm Tân đơs, do ờ mìng là ală dơ̆ tìp măt jăt tơngai geh ai, mờ gam là jơnau hơ “đơs lòt bal mờ lơh broă”, dong kờl làng bol gŏ jơnau đơs bơh să tờm dê geh sền gròi mờ geh bơsong. “Dong kờl làng bol lơh ală sră nggal mờ ñgui boh bơr bal mờ làng bol nàng iăt ală jơnau làng bol đơs, jơnau kơ̆p kờñ, ală kal ke, gơkòl tŭ làng bol tus mờ gơnoar atbồ. Bơdìh hơ̆ tai, bol añ kung dờp tơn, bơsong ală jơnau đơs pơgồp bal nàng bơ̆t bơtàu gơnoar atbồ ngai sơlơ niam rơlao. Gơwèt mờ Anih tờm Drơng broă lơh sră pơ-àr gơnoar atbồ dà lơgar dê, bol añ sùm lơh ngan jơh pràn nàng drơng niam ngan ai làng bol in tŭ tus lơh ală sră nggal”.

Dùl nam ờ hềt di là tŭ tơngai jŏ jòng, mơya tơl nàng gŏ broă tam gơl tàm bồ tơngoh drơng lơh bơh gơnoar atbồ ƀòn lơgar bàr kấp dê. Tŭ gơnoar atbồ rơcang lài tus mờ làng bol, iăt làng bol mờ bơsong ală broă bơh ƀòn lơgar, den bơta was bơh broă lơh niam sră nggal ờ mìng là cồng nha broă lơh, mờ gam là nùs nhơm pin dờn mờ di nùs làng bol dê.