Tus bal pơrjum bơyai geh rlau 150 nă cau ala mat là ală cau atbồ, cau gĭt wă jrô broă lơh, cau jak chài; ala mat uă hìu bơsram đại họk, Anih kơlôi sơnơng, mpồl lơh sa kă bro, mpồl lơh broă bal tàm càr mờ bơdìh càr. Jơnau tă pơgồp yal tàm pơrjum bơyai pà gŏ, broă lơh geh broă lơh pơgồp bal niam đah Dà lơgar - Hìu bơsram - Mpồl lơh sa kă bro là jơnau sồr jal mhar nàng Lâm Đồng in lơh pràn bơtàu tơnguh jak chài, măi mok mờ tam gơl pa bơceh lơh.

Bơta do geh bơh bơta geh ngan là gơnoar atbồ lơh broă lơh ờ hềt di mờ jơnau kờñ geh ngan; kơlôi sơnơng jak chài ờ rềp mờ jơnau kờñ lơh sa, kă bro; cồng nha kơlôi sơnơng ờ hềt geh tàm jàu geh cồng nha, tàm tŭ mpồl lơh sa kă bo kal ke gĭt tus mờ măi mok mờ cau gĭt wă jrô broă lơh. Ồng Nguyễn Ngọc Phúc, Phó Chủ tịch Anih duh broă Làng bol càr Lâm Đồng, đơs là, tàm broă lơh pơgồp bal mpồl lơh sa kă bro ai tơlik jơnau sồr, hìu bơsram mờ cau jak chài bơsong jơnau, Dà lơgar lơh geh broă lơh, tàm tơrbŏ bal bơta pràn, dong kờl priă jền mờ sơlơ tơnguh tai ngui, kă bro phan ngan ngồn geh cồng nha.