Lài mờ tŭ tus bal Dơ̆ pơrjum ờ bè ờs dơ̆ Sơnrờp, Quốc hội khoă XVI, Mpồl cau ala măt Quốc hội càr Dăk Lăk neh bơyai lơh pơrjum ai jơnau đơs tă pơgồp gơ wèt mờ ală jơnau rơcăng cih adăt rơ̆p dan Quốc hội sền swì.

Dùl tàm ală tơngume geh sền gròi là jơnau rơcăng cih Adăt tam gơl, bơtơl bàr pe bơta bơh Adăt Rơcăng, kơryan rào priă (Hơ̆ là priă geh bơh broă lơh tìs mờ kơrnoăt boh lam). Tềng đăp mùl màl cau lơh tìs ngui măy mŏk pa mờ jơtài sồ ngai sơlơ geh lơh ờ ƀươn soh, uă jơnau đơs sồr bơtơl kơrnoăt tam pà jơnau yal tơnggĭt, tàm tơrbŏ ală jơnau yal tơngĭt sồ jăt tŭ tơngai ngan đah ală ƀộ, gah nàng kờñ drơng đal gĭt cau năc, lùp wơl broă lơh gơtìp pin, jòi tềl ală priă gơ lòt mờ kơryan di tŭ ală broă lơh lơh tìs. Ồng Võ Quang Duy, ala măt Anih lơh broă Kảñ sát lùp khàu, Kwang àng càr Dăk Lăk geh jơnau đơs:

 "Tŭ do, cau lơh tìs ràu priă mờ jơtài sồ mờ pơrlồm ngui măy mŏk pa geh bơta sơrbăc jun tơ pồn ală priă là mhar ngan. Dilah ală ƀộ, gah mìng pơgồp bal jăt broă lơh pơyua sră nggal jơnau sồr bè lài den ală priă ờ di mờ adăt boh lam do neh gơtìp jun lòt gan uă tài khoản ntrờn, lơh kal ke ai broă lùp wơl, jòi tềl, kơryan broă lơh lơh tìs. Den tàng bè hơ̆, kờñ ngan pal geh bơta lơh bal đah ală tài khoản nàng bol he jòi tềl mờ kơryan ală priă do”.

Gơtùi gŏ, do là jơnau sồr gơlik bơh mùl màl tam dră rơcăng, kơryan cau lơh tìs, pơgồp bơnah lơh sir tơngume adăt boh lam nàng ală anih lơh broă geh gơnoar rơcăng lài rlau tàm sền gàr lơngăp lơngai priă jền mờ gơnoar kwơ làng bol dê. Gơ wèt mờ jơnau rơcăng cih Adăt tam gơl, bơtơl bàr pe bơta bơh Adăt Kơnòl tơm wơl bơh Dà lơgar dê, uă cau ala măt sồr kờp sền wơl ală jơnau cih bè tơngai ai bơsong jơnau sồr tơm wơl tàm tŭ dilah ală đah ring bal tơn jŏ tơngai lùp wơl hoàc hươr mờ cribơyai ring bal nàng kờñ gàr gơnoar pơyua sră yă bơh cau sồr tơm wơl dê. Mò Phan Thị Hoa, Phó Kwang Lam bồ Sờh Sền gàr adăt boh lam càr Dăk Lăk, sồr:

"Añ sồr anih lơh broă bơceh cih kơlôi sơnơng loh bơta gĭt nền tơngai jơh tơngai ai sồr tơm wơl tàm tŭ dilah ală đah geh jơnau cribơyai ring bal tơn jŏ tơngai ai lùp wơl hoàc hươr, cribơyai ring bal; halà kơlôi sơnơng bơtơl bơta broă yal bè tơngai tơn jơh tơngai ai bơsong nàng lơh geh ƀươn ƀoài ai cau sồr tơm wơl in tàm broă lơh jăt gơnoar pơyua sră yă, kung bè là gàr niam bơta ring bal tàm ală broă lơh jăt kơrnoăt boh lam”.

Ală jơnau đơs tă pơgồp do ndrờm wèt tus jơnau kờñ sền gàr niam rlau gơnoar mờ bơta kwơ dipal mờ kơrnoăt boh lam bơh làng bol dê, mơkung dong ală jơnau cih sồr pal jăt bơh adăt boh lam dê loh làng, ring bal mờ ƀươn ƀoài rlau tàm ală tŭ lơh jăt.

Bơta pal cih dờp là tơl nơm jơnau đơs tă pơgồp ndrờm gơlik geh bơh mùl màl lơh broă, yal wơl ală kal ke, gơkòl tàm ală tŭ lơh jăt kơrnoăt boh lam. Do kung là cơng tàng tơnggŏ pà gŏ broă lơh bơ̆t bơtàu kơrnoăt boh lam sùm dờp geh bơta sền gròi, kơnòl bơh ală kâp, ală gah mờ cau tĕ khà dê.

Ală jơnau đơs tă pơgồp geh tơrgùm ai bơh mùl màl ngai do rơ̆p geh Mpồl cau ala măt Quốc hội càr Dăk Lăk kơlôi sơnơng, iăt kơno, lơh bơta kơnờm tus bal cribơyai tàm hìu pơrjum. Hơ̆ kung là broă nàng tơl nơm Adăt tŭ geh ai lơh jăt mùl màl là tơrgùm jơh ală jơnau kờñ Đảng dê, nùs nhơm làng bol, lơh geh jơnau sồr bơ̆t bơtàu Dà lơgar gơnoar kơrnoăt boh lam sàh hội củ nghĩa mờ drơng broă ngai sơlơ niam rlau gơnoar, bơta kwơ dipal ngan bơh làng bol dê.