Tus tŭ do, khà ai priă bơcri dà lơgar càr Lâm Đồng dê geh 30% broă rơndăp lơh, ờ uă rơlao mờ khà kờp bal gùt lơgar là 39%, rơndăp ơm dơ̆ 31 tàm khà 34 càr, ƀòn dờng. Jơnau lơh gơbàn khà ai priă bơcri dà lơgar càr Lâm Đồng dê geh ờ uă geh gĭt nền tài gơkòl tàm broă tơm, ntrờn ù tiah; broă lơh rơcang bơcri priă gam lơyài mờ broă ai priă ờ hềt di pal mờ bơta pràn lơh bơh ờ uă rơndăp broă lơh dê.

Càr ai jơnau kờñ tus jơh nhai 9 ai priă geh pơgăp 65% broă rơndăp lơh priă bơcri. Đơs tàm dơ̆ đơng lam pơrjum, Chủ tịch Anih duh broă Làng bol càr Lâm Đồng ồng Hồ Văn Mười sồr ală sờh, gah lơh broă, ală sàh, sơnah ƀòn sền wơl tơl rơndăp broă lơh, tơrgùm tă bơsong kal ke, lơh mhar tơngai pơrgon lơh mờ ai priă; mơkung yờ tơngguh uă mờ bơsong kơnòl cau lam bồ dê.