Gùng ù gờl rơndeh lòt mhar Bảo Lộc – Liang Khàng jòng mờr 74 kơi sồ, tơrbŏ bal 2 ƀòn dờng Bảo Lộc mờ Dà Làc, lòt gan ală kơnhoàl Bảo Lâm, Di Linh mờ Đức Trọng bơh càr Lâm Đồng dê. Tàm rlau 17 rbô 700 tơmàn đong kờp jơh priă tă lơh, geh rlau 7 rbô 600 tơmàn đong ai bơh kes priă dà lơgar, gam wơl là priă bơcri bơh dà lơgar hòi jà tă pơgồp.

Rơndap broă lơh bơh Kông ty Bơcri priă bal bơcri priă Tập đoàn Phương Trang – FUTA GROUP ala mat lơh bal mờ cau bơcri priă. Jơh gùt gơl gùng rơndeh lòt mhar geh 51 nơm rbàng, tàm hơ̆ 13 nơm rbàng tàm gơl gùng tờm, 35 nơm rbàng hơđang gùng rơndeh lòt mhar  mờ 3 nơm rbàng tàm gơl gùng gơ tàm tìp. Tàm Jơnau lơh nền geh ring bal, ồng Trần Hồng Thái, Củ tịc Anih duh broă làng bol càr Lâm Đồng sồr ală sở, mpồl, gah broă lơh, ală anih lơh broă geh gơ rềng geh kơnòl lam lơh jat, pơlam, pơgồp bal, sền sơ wì broă lam lơh rơndap broă nàng gàr di mờ jơnau cih bơh adat boh lam dê. Mờ kung mhar lơh ală ƀòn ơm kis pa, lơh ală sră nggal ai wơl, ai ù lơh rơndap broă nàng rơcang sơn đờm lơh rơndap broă lơh tàm tơngai tus.