Jat jơnau lơh nền bơh Anih duh broă Làng bol càr Quảng Ngãi, broă bơtơl broă jàu nàng kờñ lơh geh jơnau kờñ bơsram bơh kơnòm bơsram dê tơnơ̆ tŭ kờp sền bơta pràn dờp bơh ală hìu bơsram dê, gàr niam di pal mờ ală bơta phan bơna, mpồl cau pơgru mờ sồr tơnguh uă cồng nha bơto bơtê. Anih duh broă Làng bol càr Quảng Ngãi jàu Kwang lam bồ Sờh Bơto bơtê mờ Bơsram in jat tàm cồng nha kờp sền bơta pràn dờp bơh tơl hìu bơsram bơto bơtê kấp pe mờ anih tờm bơto bơtê sùm. Broă sac rơwah pal geh lơh loh làng, song dơ pă, di mờ jơnau sồr mờ ngui geh cồng nha phan bơna, mpồl cau pơgru gam geh tŭ do dê.

Ồng Nguyễn Ngọc Thái, Kwang lam bồ Sờh Bơto bơtê mờ Bơsram càr Quảng Ngãi pà gĭt, broă sền gĭt broă jàu sac rơwah kơnòm bơsram geh jat tàm ală jơnau sồr bơh Chính phủ dê; mơkung kờp sền jat tơl ală bơta geh ngan bè phan bơna, cơdŭ bơsram, măi mok mờ mpồl cau pơgru bơh tơl hìu bơsram dê. Nam bơsram pa do, khà kơnòm bơsram lơh sir broă bơsram jơh kấp 2 gơguh pơndrờm mờ ală nam lài den tàng jơnau kờñ mut bơsram ơdŭ 10 dà lơgar kung uă rlau sơl.

Tơnơ̆ tŭ yal cồng nha sac rơwah kơnòm bơsram dơ̆ 1, khà kơnòm bơsram ờ gơ kờn mut tàm ală hìu bơsram dà lơgar gam uă ngan. Sờh Bơto bơtê mờ Bơsram càr Quảng Ngãi neh kờp sền wơl ală bơta bơh tơl hìu bơsram dê, is ồn là bơta pràn cơl dŭ bơsram mờ khà cau pơgru tàm dùl ơdŭ bơsram jat jơnau sồr bơh Bộ Bơto bơtê mờ Bơsram dê, jơnau sồr bơtơl tai broă jàu sac rơ wah kơnòm bơsram. Ồng Nguyễn Ngọc Thái, Kwang lam bồ Sờh Bơto bơtê mờ Bơsram càr Quảng Ngãi pà gĭt tai: “Tŭ do gam 4 hìu bơsram ờ hềt sac rơwah tơl kơnòm bơsram jat broă jàu geh jàu geh Hìu bơsram kấp pe Jơi bơtiàn ơm sa bĭc tơn tàm hìu bơsram Măng Đen; Hìu bơsram kấp pe Đinh Tiên Hoàng (kơnhoàl Sơn Tây lài do), Hìu bơsram kấp pe Tây Trà (kơnhoàl Trà Bồng lài do) mờ Hìu bơsram kấp 2 mờ kấp pe Phạm Kiệt (kơnhoàl Sơn Hà lài do). Gơwèt mờ ală hìu bơsram do, Sờh Bơto bơtê mờ Bơsram rơ̆p dờp jơnau kơ̆p kờñ bơtơl tai mờ pơn jat tai sac rơwah jat jơnau sồr ai điềm bơh jơnhoa tus lơyah nàng gàr niam sac rơwah tơl broă jàu geh Anih duh broă Làng bol càr dê jàu. Mờ Sờh Bơto bơtê mờ Bơsram kung rơ̆p ring bal mờ ală hìu bơsram nàng lơh jat broă sac rơwah bơtơl tai”.

Broă bơtơl tai mờr 2 rơbô broă jàu sac rơwah mut bơsram ơdŭ 10 dà lơgar ờ mìng lơh geh jơnau kờñ bơsram bơh kơnòm bơsram dê lơm mờ gam pơgồp bơnah tơnguh mpồl cau lơh broă, gàr niam tŭ tơngai niam gĭt mờ bơto bơtê ai cau jat bơsram in jat tàm nùs nhơm Jơnau lơh nền tàm pơrjum sồ 71 bơh Bộ Chính trị dê bè tam gơl pa bơh sơn rờp, tơl làm bơto bơtê mờ bơsram, lơh geh jơnau sồr bơtàu tơnguh dà lơgar dê tàm tơngai pa.