Drim òr (15/09), tàm Hìu Quốc hội, ồng Tô Lâm, Tổng Bí thư, Chủ tịch lơgar bal mờ Pơ-ùr đơng lam dơ̆ wă Cau Bơtau lơgar Thái Lan mờ Pơ-ùr. Dơ̆ tus còp geh bơyai lơh di tàm dơ̆ bàr lơgar tơnkah 50 nam crơng gơs git gơ̆p lơh broă bal mờ lơgar ndai - do là tŭ niam bơnĕ ngan tàm rài bơtàu tơnguh git gơ̆p đah bàr lơgar dê.

Dơ̆ tus còp bơh Cau Bơtau lơgar Thái Lan lơh mùl màl jơh ală jơnau hơ cri bơyai broă mờ lơgar ndai kấp dờng đah kwang đơng lam bàr lơgar tàm tơngai do, tàm hơ̆ uă ngan là jơnau hơ lơh geh cồng nha kwơ màng “Pe tơrbŏ bal” Hơ̆ là Tơrbŏ mpồl ai phan, tơrbŏ lơh sa mờ lơh sa đah bàr lơgar dê; Tơrbŏ mpồl lơh sa kă bro mờ càr, ƀòn dờng; Tơrbŏ ală broă kwơ màng gơguh lơh sa kơl jăp; lơh ngan gờñ ai khà kă bro phan bàr đah geh 25 tơmàn Dolar Mỹ jăt gùng dà broă lơh ndrờm bal, kơl jăp. Dơ̆ tus còp rơ̆p cih dùl bơta niam pa tàm rài git gơ̆p đah bàr lơgar dê, ai nùs nhơm lơh bơyô bal đah lơgar Việt Nam mờ lơgar Thái Lan bơtàu tơnguh ngai sơlơ jrô ơnàng, mùl màl, kơl jăp mờ geh cồng nha, tài bơta kwơ bơh làng bol bàr lơgar, tài ring lơngai, kơ̆ kơl jăp mờ pas gơs tàm tiah do.