Ồng Tô Lâm, Tổng Bí thư, Chủ tịch lơgar ưn ngài ală jơnau chờ gờm bơh Đảng Cộng sản lơgar Mỹ dê bal mờ bơyô lơgar Mỹ di tàm dơ̆ lơgar Việt Nam bơyai lơh geh cồng nha Pơrjum dờng dơ̆ XIV Đảng dê; mờ ưn ngài nùs nhơm niam, tam klăc bal mờ kờñ bal mờ Đảng Cộng sản lơgar Mỹ bal mờ uă rơnàng cau bơyô, làng bol gơguh jăk lơgar Mỹ ai lơgar Việt Nam in.

Ồng Tô Lâm, Tổng Bí thư, Chủ tịch lơgar đơs nền Đảng Cộng sản lơgar Việt Nam sền kwơ bơta git gơ̆p lơh bơyô ờs mờng mờ Đảng Cộng sản lơgar Mỹ, kơ̆p kờñ bàr đah pơn jăt tai tơnguh broă tam gơl bal, tam pà bal broă lơh mờng chài, pơgồp bal tàm broă tơnguh nùs nhơm git gơ̆p lơh bơyô bal mờ git wă bal đah làng bol bàr lơgar dê. Ala măt Đảng Cộng sản lơgar Mỹ tơlik nùs nhơm niam tềng đăp mờ ală cồng nha bơtàu tơnguh lơgar Việt Nam dê, đơs nền kơ̆p kờñ pơn jăt tai lơh pràn broă tìp bal, lơh broă bal đah bàr Đảng mờ tơnguh bơta git gơ̆p lơh bơyô bal đah làng bol bàr lơgar dê.