Drim òr (21/09), jat jơ ƀòn lơgar, tàm ƀòn dờng New York, ồng Tô Lâm, Tổng Bí thư, Chủ tịch lơgar bal mờ Mpồl cau ala mat kâp dờng lơgar Việt Nam neh tìp mat Mpồl cau geh jơnau git wă jrô mờ cau bơsram dờng Việt Nam tàm lơgar Mỹ bal mờ ală cau geh jơnau git wă jrô, cau geh bồ tơngoh bơsram sră Việt Nam gam lơh broă tàm lơgar Mỹ.

Mờr 40 nă cau ala mat lơh broă tàm ală gah bồ tơngoh jak kòn bơnus lơh gơs, jơnau yal tơnggit, rơndeh par ờ geh cau măi, bơceh lơh phần mềm, gùng dà broă lơh dà lơgar, priă jền, bơto bơsram mờ adat boh lam ală lơgar tus bal dơ̆ tìp mat. Ală cau geh jơnau git wă jrô yal uă broă lơh nàng kờñ sơlơ tơnguh gơnoar broă lơgar Việt Nam dê tàm ală mpồl lơh broă gah bồ tơngoh jak kòn bơnus lơh gơs gùt plai ù, gơ hòi gơ jà priă bơcri ală lơgar, mờ kung tàm tơrbŏ bal mpồl cau geh jơnau git wă jrô Việt Nam tàm lơgar ndai mờ cau geh jơnau git wă jrô tàm lơgar. Đơs tàm do, ồng Tô Lâm, Tổng Bí thư, Chủ tịch lơgar đơs niam ală jơnau đơs jơh nùs, mùl màl ngan; đơs sùm jơnau sồr lơh geh bơta niam nàng ală cau jak chài kơlôi sơnơng, bơceh lơh mờ tă pơgồp dà lơgar in. Tổng Bí thư, Chủ tịch lơgar đơs là, cau Việt Nam tàm lơgar ndai là mpồl cau ờ gơtùi tam cah is bơh mpồl bơtiàn jơi bơtiàn Việt Nam dê mờ là bơta pràn jŏ jòng kuơmàng ngan. Ală anih lơh broă tàm lơgar kờñ pal rơcang lài iat kơno, jà cau geh jơnau git wă jrô tus bal bơh gờñ tàm bơt bơtàu gùng dà, kơnòl broă kơlôi sơnơng mờ broă lơh bơto bơtê, bơh hơ̆ lơh geh cồng nha rlau bơta pràn bơh mpồl cau geh bồ tơngoh bơsram sră Việt Nam tàm lơgar ndai.