Hìu bơsram mẫu giáo Gia Bắc, sàh Sơn Điền, càr Lâm Đồng geh 7 ơdŭ mờ 230 nă kơnòm bơsram bơh 25 nhai tus 6 sơnam mờ 98% là oh kòn cau K’Ho Nộp. Tơnơ̆ 2 poh sơn đờm mut nam bơsram pa, broă kơlôi rơcang sa ngai ai kơnòm bơsram in neh geh hìu bơsram lam lơh jat di jơnau sồr. Mpồl đơng lam Hìu bơsram mẫu giáo Gia Bắc kung neh bơt bơtàu geh uă bơta git gơp nàng jun pơndiang phan sa pah ngai bơh tiah tờm Di Linh tus hìu bơsram, gàr phan sa ris niam bulah bơta yah ngài tus 35 kơi sồ.

Pơgru Nguyễn Thị Tuyết Lan, Lam bồ Hìu bơsram mẫu giáo Gia Bắc pà git, bal mờ phan bơna dờng niam, phan ngui bơto bơsram geh blơi bơ tơl rơcang wil tơl, ală dơ̆ sa ngai kung gàr bơta niam, hơ̆ là jơnau hơ pơrgon hìu bơsram dê nàng jơh tơl nă mè bèp kơnòm bơsram iang nùs pơyua kòn lòt bơsram: “Kơlôi rơcang, gròi sền niam ngan rlau jơh ală dơ̆ sa ală sau in, bol hi lam lơh dơ̆ sa hìu bơnhă halà ală dơ̆ sa buffet. Mè bèp sền gŏ kòn he dê sa biap piang duh, geh ală pơgru gròi sền wil tơl mờ ală sau geh pơlam tàp, dờng pràn 5 gah bơh ală môn bơsram den mè bèp iang nùs ngan”.

Tàm Hìu bơsram bal kâp 1 - kâp 2 Gia Bắc, 656 nă kơnòm bơsram tơnơ̆ ală tŭ jơ bơsram tàm ơdŭ den gam geh tus bal uă broă lơh hờ bơdìh, rề ơnàng jơnau git wă bơh hìu sền sră hìu bơsram mờ git nđờ rhiang pang sră geh kuơ ngan. Bè hơ̆ den tàng bulah rơp rlau 2 poh nam bơsram pa dê, broă bơsram ală kơnòm bơsram dê neh geh rơndap niam mờ khà lòt bơsram wil tơl uă.

Oh Ka Mộng Diệu, kơnòm bơsram ơdŭ 5C, Hìu bơsram bal kâp 1 - kâp 2 Gia Bắc, sàh Sơn Điền pà git: “Oh gŏ tus hìu bơsram chờ hờp ngan tài geh bơsram mờ ală bơyô. Phan ngui bơsram oh dê den wil tơl. Tàm ơdŭ den pơgru dong kờl oh uă ngan tàm broă bơsram sră. Oh kờñ bơsram ngan rlau jơh là môn Toán mờ môn đơs crih. Să tờm oh gŏ dilah oh lơh ngan tàm nam bơsram do den rơp geh kơnòm bơsram jak”.

Nam bơsram 2026 - 2027, sàh Sơn Điền geh 2 hìu bơsram mầm non, 1 hìu bơsram kâp 1 mờ 2 hìu bơsram kâp 2 mờ kờp jơh geh 1 rbô 722 nă kơnòm bơsram, khà kơnòm bơsram jơi bơtiàn dồ êt nă cau geh tus rlau 94%. Bal mờ ală gùng dà broă lơh Đảng, Dà lơgar dê ờ sa priă bơsram, dong kờl priă bơsram sră, ală kơnòm bơsram tàm sàh Sơn Điền gam dờp geh bơta sền gròi bơh gơnoar atbồ, ală mpồl cau ƀòn lơgar mờ uă cau geh nùs nhơm niam tàm càr kung bè bơdìh càr Lâm Đồng. Bulah là tiah uă kal ke, mơya jơh ală hìu bơsram tàm Sơn Điền ndrờm dờng niam lơm. Ală kơnòm bơsram lòt bơsram mờ phan soh sàng goh, niam bơnĕ, nùs nhơm kung chờ hờp chờ hờn ngan.

Ồng Vũ Đức Nhuần - Chủ tịch Anih duh broă Làng bol sàh Sơn Điền đơs nền: “Sàh Sơn Điền là sàh kal ke, mơya bơto bơsram pal gơ ơm tàm khà sap sèng niam càr dê. Bulah kal ke kàr lơi kung pal tàm pơrlòng bơto niam, bơsram jak bè jơnau tơngkah Chủ tịch Hồ Chí Minh dê. Nam bơsram pa, ală hìu bơsram neh geh bơta rơcang niam ngan mờ is ồn gơ wèt mờ ală pơgru kung ndrờm geh nùs nhơm pa. Bol hi neh jàu Cơldŭ lơh sa in lài lài priă jền dong kờl di tŭ ală hìu bơsram in dilah geh broă pa gơlik geh”.

Bal mờ sơrbac mhar gàr kơ̆ broă bơto bơtê mờ bơsram tơnơ̆ 2 poh sơn đờm mut nam bơsram pa, Mpồl đơng lam 5 hìu bơsram bơh mầm non tus kâp 2 tàm sàh uă kal ke Sơn Điền, càr Lâm Đồng kung gam lơh ngan lơh jat jơnau lơh nền tam gơl sồ, tơrgùm tàm broă ngui geh cồng nha phần mềm atbồ bơto bơsram, jơnau yal tơnggit gah do mờ ală bơta tờm drơng atbồ, bơto bơsram. Gơ wèt mờ bơta ờ tơl sră măi, ngan là ơdŭ 9, pơgru Nguyễn Đình Tú - Lam bồ Hìu bơsram bal kâp 1 - kâp 2 Gia Bắc, sàh Sơn Điền pà git, tàm tŭ kơp sră bơh mpồl kĭ sră pơrgon tac sră, hìu bơsram rơcang lài lam lơh bàr pe broă lơh nàng gàr niam broă bơsram sră kơnòm bơsram dê in.

Pơgru Nguyễn Đình Tú, Lam bồ Hìu bơsram bal kâp 1 - kâp 2 Gia Bắc, sàh Sơn Điền pà git tai: “Tŭ sră măi tàm dơ̆ 1 jun rê bơh hìu tac sră, hìu bơsram neh tam pà jat khà kơnòm bơsram tàm ơdŭ. Pơn yơu bè dùl gah geh 100 ƀộ den tam pà ndrờm bal kơnòm bơsram in. Dơ̆ 2 là rơndap sap sèng kơnòm bơsram nggui bal dùl kơ ƀàng êt ngan kung pal geh dùl ƀộ sră măi nàng ală oh geh sră ngui. Hìu bơsram bơyai lơh ală dơ̆ bơsram mpồl nàng gơtùi ngui sră măi”.

Bơh ală dơ̆ sa ngai geh kơlôi rơcang, sền gròi tơl làm, ală ơdŭ bơsram ngai sơlơ dờng niam, tus bơta jơh nùs pơgru dê mờ bơta lòt bal gơnoar atbồ, mè bèp, mpồl bơtiàn dê, jơh ală gam pơgồp bơnah lơh gơs dùl nam bơsram pa mờ uă bơta chờ hờp tàm sàh uă kal ke Sơn Điền, càr Lâm Đồng. Mờ bơta lơh ngan “Sàh kal ke mơya bơto bơsram pal niam”, Sơn Điền gam rơhời lơh bơta sền gròi, bơcri priă gơ gơs cồng nha mùl màl tàm tơl ơdŭ bơsram, tơl dơ̆ sa mờ pah ngai lòt bơsram bơh kơnòm bơsram dê.