Tàm tŭ chŏ ù nàng tam tờm keo tàm tiah bơnơm Suối Dứa, thôn Đồng Lãnh, sàh Phú Hòa 2, càr Dăk Lăk, ồng Trần Văn Lợi, ơm tàm thôn An Mỹ Nam, gĭt gŏ dùl gơnru ơyun tàm dơlam ù. Tàm dơlam geh uă phan ngui pin là phan lời wơl bơh cau ling dê den tàng ồng yal mờ anih lơh broă ling klàng tiah do dê.

 Ngai 21/9, Mpồl đơng lam Ling klàng sàh Phú Hoà 2 pơgồp bal mờ Mpồl K51, Phòng Chính trị, Gah đơng lam Mpồl ling klàng càr Dăk Lăk bơyai lơh lòt jòi mờ rồ tơrgùm ƀồc ntìng cau ling chơ̆t màng. Bal mờ ƀồc ntìng, mpồl lơh broă geh gơnoar gĭt gŏ 13 nơm kơcing ào, ào mpha cau ling, gai croh sề, nsàng gar phàu, che kơ̆t ơyun, ngke phàu, khoá balo... Tài bơh ntìng neh gơlik ù (gơtìp ồm tàm ù) ờ tơl ală bơta nàng ai mẫu sền gĭt ADN. Ƀồc ntìng gam geh prap gàr tàm Hìu kah kơlôi cau ling chơ̆t màng thôn Phụng Trường 1, kơ̆p bơyai lơh dơ̆ ies mờ tơ̆p ƀồc. Do là ƀồc ntìng cau ling chơ̆t màng dơ̆ 35 geh Mpồl K51 rồ tơrgùm tŭ lam lơh “Broă  lơh dờng 500 ngai màng”..