Sơrlèt mờ 7 mpồl pơrlòng ndai nàng geh jai pha tàm dơ̆ pơrlòng bơceh lơh phan geh lơh wơl bơh siồ siă đù geh Đoàn sàh bơyai lơh, phan Rùp ù tiah lơgar Việt Nam bơh ci đoàn ƀòn Cuôr Dăng A ai tơngŏ broă bơceh pa. ală đoàn viên neh ngui “siồ siă” nàng lơh geh phan geh kwơ tàm broă ngui mờ geh nùs nhơm mblàng yal uă. Lŏ H’ Tuyết Niê, Ƀí thư ci đoàn ƀòn Cuôr Dăng A, sàh Cuôr Dăng, kơnhoàl Cư̆ Mgar yal: “Tus mờ dơ̆ pơrlòng do, ci đoàn ƀòn añ cèng tus phan rùp ù tiah dà lơgar Việt Nam geh lơh bơh ală phan lơh geh wơl, ngui tàm rài kis pah ngai bè pơ-àr, ding đù, pơnŏp khàr mờ ală phan ngui ndai. Phan lơh do pơyoa tus jơnau yal bè bơta kờñ gơgoh ƀòn lơgar, dà lơgar, kung bè nùs nhơm pơnyờ să jơi bơtiàn, gơnoar tờm mờ tơl niam ù tiah dà lơgar dê. Bơh tŭ hơ̆, să tờm añ kung bè rơnàng kơnòm să pơn jăt tai lơh ngan bơsram tàp, bơsram sră nàng bơ̆t bơtàu mờ sền gàr Dà lơgar kơl jăp”.

Bal mờ ală dơ̆ pơrlòng, tàp pràn să jan nhai Ơruh pơnu nam do tàm càr Dăk Lăk geh uă ngan broă tơrgùm gal cau, ală broă lơh nùs nhơm dong kờl is tài mpồl bơtiàn. Mờ tơngu me “Ơruh pơnu lam lài, lơh broă nùs nhơm dong kờl is tài rài kis mpồl bơtiàn”, uă broă lơh geh bơyai lơh dơ̆ lĕ bal tàm gùt càr bè Ngai Rơlô tơlir, ngai lơh broă uă Nùs nhơm dong kờl is bơ̆t bơtàu ƀòn drà gơguh jăk, lik lơh broă ală mpồl tam gơl sồ drơng mpồl bơtiàn in. Bal mờ ală broă lơh bal geh đoàn kấp dờng lơh, đoàn tàm ală tiah kung lơh uă broă lơh, bơnah broă mùl màl, di pal mờ mùl màl tàm tơl tiah, mpồl lơh broă dê. Lŏ H’ Vinh Êban, ci đoàn ƀòn Kroa B, sàh Cuôr Dăng, kơnhoàl Cư Mgar pà git, mờr 300 thơ̆k gùng bồng bi Dà lơgar neh geh đoàn ơruh pơnu lơh nàng chờ gờm ală ngai chờ dờng, kwơ màng tàm nhai 3. Bal mờ hơ̆, ơruh pơnu kung tus bal pơs wàs kloh niam tiah kis, mus pès chi che, tơrgùm siồ siă tềng tiah dà mbòr Ea Mkang mờ tam tờm chi tàm ờ uă tiah mpồl bơtiàn in. “Añ bal mờ ală bơyô đoàn viên ơruh pơnu neh lik lơh gùng bồng bi ơruh pơnu, tam bơkào pơ-àr mờ bơyai lơh toah wàs dà mbòr. Bơh ală bơnah broă do, añ gŏ chờ hờp ngan tài añ neh pơgồp bal bơta pràn tàm broă lơh ală broă, bơnah broă ơruh pơnu tàm ƀòn dê”.

Jăt bi Y Lê Pas Tơr, Phó Ƀí thư Duh broă sùm Tỉñ đoàn, Củ tịc Mpồl tam klăc ơruh pơnu Việt Nam càr Dăk Lăk đơs, bơh 3 poh lơh ală broă nhai ơruh pơnu, neh geh mờr 220 mpồl lơh broă nùs nhơm dong kờl, lơh rơlao 200 broă lơh, bơnah broă tàm ală ƀòn. Mờr 160 mpồl lơh broă Bơto làng bol bơsram sồ geh lơh, tus bal dong kờl bơto nàng git wă sồ ai làng bol in. Ơruh pơnu tàm gùt càr kung tă priă, ngai lơh broă nàng lơh 25 nơm hìu tàm broă lơh tus bal tơn jơh hìu sèt, hìu ñhăt dà mìu. Bơta pa bơh Nhai Ơruh pơnu nam do là ală broă lơh dờp bal lơh jăt broă pơrlòng tus bal tơn jơh hìu sèt, hìu ñhăt dà mìu; lơh geh cồng nha Jơnau lơh nền sồ 57 bơh Ƀộ Cíñ trị dê bè broă lơh mhar bơtàu tơnguh bơta jăk chài, măi mok pa, tam gơl pa bơceh lơh mờ tam gơl sồ dà lơgar bơh broă Bơto làng bol bơsram sồ. Bơh tŭ dờp tơngu me, ală kấp, ƀộ, đoàn neh geh broă rơndăp lơh mùl màl, lơh di tơn bơh tàm ală ngai sơnrờp. “Lơh geh ală jơnau geh ai is tàm Nhai Ơruh pơnu, lơh jăt tơngu me bơh nam dê kung bè ală kơnòl broă tàm nhai pe. Tam pà ală khà broă lơh mùl màl ai ală kơnhoàl, ƀòn drà dờng, thàñ đoàn mờ đoàn gơwèt bal, sồr lơh ală mpồl lơh broă mìng dùl tơngu me lơm jăt tơl kấp, ai geh dùl bơta gơrềng ndrờm bal tàm gùt càr. Bol añ rơ̆p lơh ngan ngui uă rơlao tai măi mok pa tàm ală broă lơh nàng lơh nền nòn, lơh geh uă ngan, mhar ngan mờ geh cồng nha ngan tus mờ đoàn viên, ơruh pơnu”.

Nhai Ơruh pơnu nam 2025 neh tơn jơh mờ ală bơta niam ai tơngŏ bơh cau kơnờm să ală jơi bơtiàn kis tàm Tây Nguyên dê-bơta jơh nùs, nùs nhơm geh kơnòl bal mờ jơnau kơ̆p kờñ lơh broă. Ală broă ơruh pơnu, ală broă nùs nhơm dong kờl ờ mìng cèng geh bơta kwơ mùl màl ai mpồl bơtiàn in mờ gam bơ̆t bơtàu nùs nhơm tam klăc, nùs nhơm pơnyờ să mờ jơnau git wă bơ̆t bơtàu ƀòn lơgar. Rơlao mờ ală khà sồ geh, hơ̆ là ală săp ñŏ nhơl, ală mpàng tê tus bal mờ ală plai nùs pràn kơl dang. Broă lơh drơng gàr bơh cau kơnòm să rơ̆p ờ ơm wơl tàm Nhai Ơruh pơnu mờ rơ̆p pơn jăt tai lơh geh uă tàm tơl broă lơh dềt pah ngai, pơgồp bal tàm broă lơh nàng Tây Nguyên ngai sơlơ bơtàu tơnguh kơl jăp, pas gơs mờ niam bơnĕ.