Lòt ling bơh nam 14 sơnam, cau ling yau ồng Lâm Xuân Quang, nam do 70 sơnam, pà gĭt: "Kàl prang nam pa 1969 tŭ añ ơm tàm tiah tam lơh tiah đah Mat tơngai lik, añ kơno Củ tịc Hồ Chí minh gờm chờ sa tềp bơh jơnau nrĭ... Iăt săp đơs Wa dê dờng màng, ram mhŭ lơh añ geh ngoh rơngăc sồr ngan là tus dì tŭ lơi hơ̆ rơ̆p lơh dùl ù tiah duh khoai Wa Hồ”.

50 nam kơlôi sơnơng kơ̆p kờñ tàm bồ tơngoh, jòi tơrgùm sră nggal prap lời wơl, tus nam 2018, tơnơ̆ tŭ lơh niam wơl hìu ồng gam ơm, ồng jơh nùs lơh ngan lời dùl cờn hìu nàng lơh dùl “Hìu ơn prap phan kwơ yau” să tờm dê bè Củ tịc Hồ Chí Minh. Kơno yal tiah lơi geh sră nggal lời wơl bè Củ tịc Hồ Chí Minh là ồng geh mat lơm, halà mìng kơno yal tàm Rơdiô, tivi, sră ƀăo đơs bè Củ tịc Hồ Chí Minh, ồng rơ̆p cih wơl.

Lam bol añ lòt còp tiah ràng tơlik ơnàng pơgăp 300 thơk vuông, ồng Quang pà gĭt, ală rùp hin, sră nggal lời wơl geh jòi tơrgùm bơh uă tiah. Is ồn ngan rlau jơh là, rùp hin bè gùng Trường Sơn, rùp hin rơndeh sơtang tơm tơrlah mpồng Gơlăng Độc Lập tàm klo ngai, ngai 30/4/1975 bal mờ uă rùp hin kah yau geh ồng Quang lơh tơngŏ wơl niam ngan jat kềng 2 gah kơlik hìu ơm is bơh ồng dê: "Mut tàm do sơn rờp ngan là gŏ phan wăc sềr rùp ù tiah gùt plai ù, cih wơl gùng lik lòt jòi gùng dong klàs dà lơgar bơh Wa Hồ dê bơh pơgap 40 lơgar. Bơh do, Củ tịc Hồ Chí Minh tềm pềr geh bồ tơngoh, bơta gĭt wă, bơta kơ̆p kờñ ring lơngai, lơngăp lơngai is jơi bơtiàn, nùs nhơm khin cha Hồ Chí Minh dê nàng rê tàm lơgar đơng lam kăc màng geh cồng nha. Ai do là Pác Bó, dà croh Lênin, bơnơm Các-Mác, do là Pơrjum dờng Diên Hồng nam 1945… Ai do là 2 phan lời kir sơnrai mờ Wa Hồ ngui uă ngan rlau jơh là Măi cih akhar mờ rơziô.. Ai do là rùp hin ală hìu ơm tàm tiah đah Tô, đah Jum dà lơgar, mờ dà dờng, dà mbòr, plung... geh ơn tàm gùl tiah ràng tơlik dê, bè kờñ đơs tus nùs nhơm bơh làng bol tiah đah Jum Dà lơgar wă rò Củ tịc Hồ Chí Minh tŭ Dà lơgar tơrgùm dùl”.

Ala tài bơh mìng pờ mpồng tàm ală dơ̆ kwơ màng is ồn, hìu ơn prap phan kwơ yau dồ nă să bè Củ tịc Hồ Chí Minh bơh ồng Quang dê sùm pờ mpồng khat gơboh. Ồng kung là cau lơh kơnòl broă Bơto pơlam nàng yal tơngĭt ală phan kir sơnrai bal mờ ală jơnau yal niam ngan, pa ngan bè Wa Hồ dê. Bơyô Hoàng Ánh Ngọc, ơm tàm ƀòn dờng Hồ Chí Minh, tus sền “ù tiah niam chài Hồ Chí Minh”, đơs: "Añ lòt bal mờ mè bèp añ mờ ală cau bơyô bơh mè bèp dê, ală cau ling yau, tus sền “Ù tiah niam chài Hồ Chí Minh” bơh wa Quang dê. Ngoh rơngăc ngan... Broă lơh geh wa lơh nền nòn, niam ngan. Wa Quang pal jơh nùs jơh tồr ngan hơ̆ sồng gơtùi lơh broă lơh bè do. Rơnàng kơnòm să bè bol añ geh wă uă rlau tai bè Củ tịc Hồ Chí Minh, bè dơ̆ tam lơh bơh jơi bơtiàn nàng geh rài lơngăp lơngai is tŭ do dê”.

Ơm tàm sơnam 70, ồng Lâm Xuân Quang kơ̆p kờñ gơtùi lơh dùl “Ù tiah niam chài Hồ Chí Minh” mờ măi mok 4D nàng lơh tơngŏ wơl tơl làm rùp hin, sră nggal prap lời wơl bè Wa Hồ dê dong làng bol Việt Nam mờ gơ̆p bơyô ală lơgar kờñ jòi gĭt bè Củ tịc Hồ Chí Minh dùl bă ngan ngồn, niam ngan rlau jơh.