Kơnhoàl Dăk Mil geh bă ù chi jŏ nam uă ngan rlau jơh càr Dăk Nông. Do kung là dùl tàm 3 kơnhoàl tiah đah Tô càr Dăk Nông, gơtìp gơrềng kơn jơ̆ ngan rlau jơh bơh jơnau geh ngan ờ tơl dà tuh tàm uă tiah. Hìu bơnhă ồng Nguyễn Công Ngãi ơm tàm sàh Dăk Lao, kơnhoàl Dăk Mil geh rlau 2 lồ kơphê tam bơrlŭ bal mờ sầu riêng. Ồng pà gĭt, hìu bơnhă tuh dơ̆ 2ờ hềt jơh den dà bơh tàm tơnhau 40 (thôn Dăk Thọ) neh soăt jơh.

“Nam do, dà gơ soăt mhar ngan, cau lơh broă sa bol hi ờ thàn rơcăng. Tŭ do pah ngai geh bàr pe jơ̆t nơm măy ƀồm ơm drơng sùm kềng gah tơnau 40, ai dà gơ rê tus tơnau mìng kơnờm tàm măy ƀồm bơh Kông ty Ngui dà càr Dăk Nông. Dilah khi ƀồm dà rê hờ tơnau sùm den kung mìng lơh geh pơgăp 1/5 lơm jơnau kờñ tuh dà bơh làng bol dê.

Jăt Anih duh broă Làng bol kơnhoàl Dăk Mil, trồ tơngai duh tơr ồ ir gam lơh mờr 5 rbô lồ chi tam tàm ù tiah càr geh pơhìn ờ tơl dà tuh uă ngan. Bal mờ hơ̆, mờr 300 hìu bơnhă geh pơhìn ờ tơl dà ngui sa tàm lồi kàl prang.

Tàm kơnhoàl Krông Nô, bàr pe tiah jăt gah dà croh Dăk Sôr gam ờ tơl dà tuh. Dilah trồ ờ mìu, pơhìn prang dờng rơ̆p pơhìn pơgăp 1 rbô lồ chi tam.

Jăt ồng Võ Văn Minh, Phó Kwang Lam bồ Sờh Broă lơh sa sươn sre mờ Tiah ơm kis càr Dăk Nông, jơnau prang dờng neh sơnđờm gơrềng uă ngan tus gĭt nđờ rbô lồ chi tam, uă ngan là kơphê, tiêu mờ chi sa plai. Bơh gùl nhai 03, gah lơh broă geh gơnoar neh tam pà dà tàm bàr pe ƀòn lơgar nàng drơng mờ trồ prang. Mùl màl, dà geh jun bơh tơnau Tây mờ bàr pe tơnau ơm rềp bal gơ wèt kơnhoàl Dăk Mil nàng bơtơl ai tiah ro kơnrañ in gơ wèt ală kơnhoàl Dăk Mil mờ Krông Nô.

Anih duh broă Làng bol càr Dăk Nông neh geh sră sồr gah lơh broă sa sươn sre mờ Anih duh broă Làng bol ală kơnhoàl, ƀòn dờng, kông ty ngui ală broă bơ̆t bơtàu ngui dà tuh chi tam in sùm lòt sền, jăt sền bơta prang ro kơnrañ mờ lơh jăt ală broă lơh bơsong, broă rơndăp lơh drơng trồ prang soăt dà. Càr kung sồr lơh mhar tŭ tơngai lam lơh 2 rơndăp broă lơh tơngguh uă cồng nha ngui dà tàm ù tiah kơnhoàl Cư Jŭt mờ Dăk Mil (mờ kờp jơh priă tă lơh rlau 500 tơmàn đong) nàng kờñ ală broă bơ̆t bơtàu geh ai ngui di tơngai, di tŭ ai dà drơng làng bol in lơh sa mờ ngui sa.