Ngai 23/4, Mpồl lơh kơnòl broă sùm Tỉñ ủy càr Dăk Nông neh pơrjum mờ ring bal broă rơndap lơh rơndap tap sèng ală mpồl lơh broă sră pơ àr gơnoar atbồ kâp sàh. Bơh 71 sàh, sơnah ƀòn, ƀòn drà dềt, Dăk Nông rơp rơndap tap sèng wơl gam 28 sàh, sơnah ƀòn. Broă rơndap lơh do rơp pơn jat tai geh yal Mpồl duh broă làng bol càr Dăk Nông in tàm pơrjum geh lơh tàm ngai 25/4 do. Lài hơ̆, Anih duh broă làng bol càr Dăk Nông neh phàt rlau 148 rbô 600 pang sră ai jơnau đơs tus ala mat cau tĕ khà bơh jơh ală hìu bơnhă tàm càr dê. Cồng nha, geh 144 rbô 643 nă cau tĕ khà ring bal mờ broă rơndap lơh tơmut bal, geh rlau 96%.

Bè mpồl lơh broă sră pơ àr gơnoar atbồ kâp sơnah ƀòn, ƀòn dờng Gia Nghĩa tơmut bal gơs 3 sơnah ƀòn bè tơnơ̆ do: crơng gơs sơnah ƀòn đah tô Gia Nghĩa bơh bơta tơmut bal ală sơnah ƀòn Quảng Thành, Nghĩa Thành, Nghĩa Đức mờ sàh Dăk Ha; crơng gơs sơnah ƀòn đah jum Gia Nghĩa bơh bơta tơmut bal ală sơnah ƀòn Nghĩa Phú, Nghĩa Tân mờ sàh Dăk Rmoan; crơng gơs sơnah ƀòn đah mat tơngai lik Gia Nghĩa bơh bơta tơmut bal sơnah ƀòn Nghĩa Trung mờ sàh Dăk Nia.