Tàm tơngai lơh broă lài, Mpồl tam klac Cau ùr ală kâp neh rơcang lài tam gơl pa tơngume, broă lơh, geh ai tơnggŏ bơh ală broă lơh bè srơh tàm pơrlòng “Bơt bơtàu Cau ùr Việt Nam rài pa”, dơ̆ lam sồr “Bơt bơtàu hìu bơnhă 5 ờ, 3 sàng goh”; ală broă lơh dong kờl cau ùr tơrmù rƀah, bơtàu tơnguh lơh sa geh lam lơh jrô ơnàng, pơgồp bơnah dong kờl rlau 200 rbô hìu bơnhă geh cau ùr lik klàs rƀah, 118 rbô nă cau ùr geh dong kờl sơn đờm mut lơh broă mờ tơng gơs pa rlau 700 mpồl lơh broă bal bơh cau ùr tus bal atbồ.

Pơrjum dờng neh pồ Mpồl duh broă Mpồl tam klac cau ùr dà lơgar Việt Nam khoă XIV geh 11 nă cau. Mò Lê Thị Thủy geh pồ wơl lơh Chủ tịch Mpồl tam klac cau ùr Việt Nam tơngai lơh broă pa. Đơs sồr lơh tàm pơrjum, ồng Trần Thanh Mẫn - Chủ tịch Quốc hội đơs nền, tàm jơh gùt tơngai kah yau jơi bơtiàn dê, cau ùr Việt Nam neh đơs nền gơnoar broă kuơmàng tàm jơh ală gah broă bơh rài kis mpồl bơtiàn dê. Ồng Trần Thanh Mẫn pin dờn, mờ bơhiàn ờs mờng niam bơnĕ, nùs nhơm kờñ gơboh dà lơgar, bơta phi să, nùs nhơm lơbơn niam, bơta bơceh lơh mờ nùs nhơm brồ guh pràn ngan, cau ùr Việt Nam rơp pơn jat tai geh uă tă pơgồp dờng màng rlau tai ai bơta bơtàu tơnguh mhar mờ kơ̆ kơljap bơh dà lơgar dê in tàm rài pa, dipal mờ 8 akhar mừh mờ Wa Hồ kờñ gơboh neh pà cau ùr Việt Nam in “Khin cha jak chài - Kơ̆ dơn - Dòn song lơbơn niam -  Tryăng tryồng”.