Mùl màl bơh tiah đah jum Tây Nguyên ai gŏ, gùng dà, broă lơh bulah neh geh uă tam gơl mơya kung gam ală bơta gơ kòl kờñ pal gờñ geh tă bơsong. Ala mat Anih duh broă Làng bol càr Lâm Đồng dan Dà lơgar pơn jat tai lơh sir ală adat boh lam jat gùng dà ndrờm bal, ring bal; tơrmù lơyah tŭ tơngai bơsong sră pơ àr gơnoar atbồ; lơh ƀuơn broă rơndap lơh ai wơl mờ ai wơl ù geh tơngai hơ pơrgon. Bal mờ hơ̆, ƀòn lơgar kơp kờñ gờñ bơsong ală bơta gơ kòl bè rơndap ù tiah ồs đèng, phan bơna pờ tơlik ồs đèng, giă ù, tàm pơrlòng giă gơnoar ngui ù mờ gùng dà ngui ù, phan bơna dà lơgar nàng kờñ ai priă jền, gơ hòi gơ jà bơcri priă.

Bơdìh hơ̆ tai, Mpồl Duh broă sùm Anih duh broă Mặt trận Dà lơgar Việt Nam càr sồr lơh sir ală jơnau cih bè jat sền, cribơyai mpồl bơtiàn, đal git loh kơnòl ală anih lơh broă tàm broă cih dờp, mblàng lơh loh mờ lam lơh đơs wơl, dan wơl tơnơ̆ jat sền. Ala mat ală sờh, gah broă lơh kung neh tă pơgồp uă jơnau đơs jơh nùs tàm 15 rơndap lơh adat boh lam mờ 4 rơndap lơh jơnau lơh nền tàm pơrjum, is ồn là tơrgùm tàm Adat Ù tiah (tam gơl), Adat Hìu ơm (tam gơl), Adat Kă bro ù tiah hìu đam (tam gơl), Adat Lơh glài tìs kup màng (hìñ sự) (tam gơl) halà ală adat gơ wèt gah ling klàng, sền gàr dà lơgar…

Yal wơl dồ êt bơta kuơ ală jơnau đơs, jơnau dan do dê, ồng Y Thanh Hà Niê Kđăm, Kwang geh jơng Đảng Dà lơgar, Bí thư Tỉnh ủy càr, Cau Lam bồ Mpồl cau ala mat Quốc hội càr Lâm Đồng đơs sùm: “Ală jơnau đơs càr dê bal mờ mpồl dê neh dong mpồl geh ală jơnau yal tơnggit mùl màl, loh làng, geh bơnàng jă mùl màl nàng mpồl đơs tàm dơ̆ pơrjum dơ̆ dùl là tàm broă tă pơgồp jơnau đơs lơh sir ală gùng dà, broă lơh bơh ală jơnau lơh nền Đảng Dà lơgar dê. Gơ wèt mờ ală jơnau đơs, jơnau dan geh đơs tàm dơ̆ lơh broă ngai do, Mpồl cau ala mat Quốc hội càr rơp kơlôi sơnơng, sac rơ wah ală broă tờm, dipal nàng đơs tàm dar cribơyai jơnum, cribơyai tàm hìu pơrjum, hơ̆ sồng pơyua ală anih lơh broă Quốc hội, Chính phủ, Thủ tướng Chính phủ mờ ală Ƀộ, Gah broă lơh Dà lơgar in sền swì, bơsong jat gơnăp gơnoar”.

Broă Quốc hội rơcang lài bơyai lơh Dơ̆ pơrjum ờ ờs mờng nàng di tŭ lơh nền ală broă jal mhar ai tơnggŏ nùs nhơm lòt bal, drơng wơl broă lơh ngac ngar tài bơta bơtàu tơnguh bal. Ală jơnau đơs song dơpă, bềng bơta mùl màl bơh càr Lâm Đồng dê là bơta đo was niam ngan rlau jơh ai nùs nhơm “làng bol git, làng bol bơyai, làng bol lơh, làng bol sền swì”. Tă ai ală bơta pră jền bè ù tiah, năng lượng mờ phan bơna bơt bơtàu ờ mìng là jơnau hơ ai bơta tam gơl pràn càr Lâm Đồng dê in mờ gam tă pơgồp mùl màl tàm bơta tam gơl pràn tiah Tây Nguyên dê tàm tŭ tơngai bơtàu tơnguh pa.