Tàm Dăk Lăk, ală tơngume geh ai jơnau đơs geh: Adăt tam gơl, bơtơl bàr pe bơta bơh Adăt Kơnòl tơm wơl bơh Dà lơgar dê; Adăt tam gơl, bơtơl bàr pe bơta bơh Adăt Anih priă jền Dà lơgar Việt Nam, Adăt Rơcăng, kơryan ràu priă (hơ̆ là lơh priă geh bơh broă lơh tìs gơgơs priă dipal mờ adăt boh lam) mờ Adăt Ală mpồl ai càn priă dê; Adăt tam gơl, bơtơl bàr pe bơta bơh Adăt Tàm jàu măy mŏk, Adăt Viễn thông, Adăt Lơh broă điện tử, Adăt Tần số vô tuyến điện; bal mờ bàr jơnau rơcăng cih jơnau lơh nền tàm pơrjum Quốc hội dê bè rơcăng, dră wơl cau lơh tìs mờ kơrnoăt, gùng dà broă lơh krơi is bơsong lơh tìs kơrnoăt boh lam gơrềng tus lơh sa, tam gơl pa bơceh lơh, tam gơl sồ.

Ala măt ală anih lơh broă càr Dăk Lăk dê neh dan lơh sir uă jơnau sồr pal jăt gơlik geh bơh mùl màl.

Tàm càr Lâm Đồng, ala mat ală Sờh, gah neh tus bal 8 dơ̆ tă pơgồp jơnau đơs mờ 15 rơndăp broă lơh adat, 4 rơndăp broă lơh Jơnau lơh nền tàm pơrjum gơrềng mờ adat boh lam, tàm hơ̆ uă jơnau tă pơgồp gơwèt mờ Adat Ù tiah (tam gơl), Adat Hìu ơm (tam gơl); Adat Kă bro ù tiah hìu đam (tam gơl); rơndăp broă lơh Adat Lơh tìs glài kŭp jàm gam geh đơs là hìñ sự (tam gơl); Rơndăp broă lơh Adat tam gơl, bơtơl bàr pe bơta geh ngan bơh tiah do dê.

Mpồl cau ala mat Quốc hội càr Lâm Đồng neh tơrgùm wơl, rơwah ală tơngume tờm nàng yal tàm dơ̆ pơrjum ờ bè ờs dơ̆ 1, Quốc hội khoă XVI.