Đơs pơn dut dơ̆ pơrjum, ồng Lê Tiến Châu - Phó Thủ tướng đơs sùm: Gah bơto bơsram kờñ pal gàr kơ̆ nùs nhơm, kơ̆ dơn tam gơl pa jat gùng dà pa, mut gơ rờm bal mơya pal kơrhia, nền nòn mờ geh bơta sac rơ wah. Bè broă lơh pơrlòng mờ rơ wah kơnòm bơsram, Phó Thủ tướng sồr rơ wah loh jơnau kờñ bơh tơl dơ̆ pơrlòng dê. Gơ wèt mờ rơ wah kơnòm bơsram ơdŭ 10, Ƀộ Bơto bơtê mờ Bơsram kờñ pal ai lơh jat ală jơnau sồr tơl khà, sơlơ dong rơ wah di gùng, jơnau kờñ bơsram broă lơh; jàu ƀòn lơgar in rơcang lài rơ wah kơnòm bơsram dipal, mìng bơyai lơh pơrlòng gơ wèt mờ ală hìu bơsram mìng dùl gah mờ hìu bơsram geh bơta niam uă nàng kờñ tơrmù bơta kơn jơ̆ kơnòm bơsram in.

Gơ wèt mờ dơ̆ pơrlòng jơh bơsram kâp pe, Phó Thủ tướng sồr pơn jat tai gàr bè ờs nàng gàr niam sền swì bơta niam kơnòm bơsram, mờ kung tam gơl pa pràn jak sền swì mờ mpồl jat sền. Phó Thủ tướng đơs là, gah bơto bơsram kờñ pal lơh glài kràñ ală broă lơh tìs mơya pal gàr bơta niam chài kòn bơnus, kràñ cê sang tĕ bơta kờñ lơh geh cồng nha, gàr kơ̆ bơta pơlam gùng tam gơl pa tài bơta niam ngan ngồn.