Tàm anih tờm drơng broă sră pơ àr gơnoar ătbồ dà lơgar sàh Ia Hrung, càr Gia Lai dê, kờp bal pah ngai, bi Phạm Thị Thủy, cau mờng lơh broă Cơldŭ Lơh sa dờp rlau 10 ƀộ sră nggal ù tiah. Lài do, bơnah uă tŭ jiơ bi dê lời ai broă sền tơl bơta sră pơ àr, tàm pơndrờm mờ jơnau cih kơrnoăt boh lam dê. Bơh tŭ geh bồ tơnggoh jak kòn bơnus dê lơh gơlik (AI) dong kờl, bi mìng sòl sră nggal tềng ală anih, phan ngui rơ̆p sền wơl, tơrgùm wơl mờ ai gĭt tơn ală tơngume kờñ pal sền ngăc halà sră pơ àr gam ờ tơl. Tài bè hơ̆, cồng nha lơh broă bi dê gơguh tus uă dơ̆:

"Tŭ ờ hềt geh AI dong kờl, dồ ngai he mìng sền geh pơgăp 4 tus 5 ƀộ sră nggal lơm. Tơnơ̆ tŭ ngui AI săc rwah sră nggal, khà do gơguh tus pơgăp 15 tus 20 ƀộ. Ù tiah ƀòn lơgar ơnàng ngan den tàng broă săc rwah sră nggal nàng lơh bơsong là kờñ ngan. Tŭ hơ̆ he tơrgùm tàm broă lơh sền swì bơta geh ngan tŭ do, ù geh bơh lơi  mờ tơngai ngui ù”.

Ia Hrung là dùl tàm ală ƀòn lơgar geh bơnah sră nggal kờñ bơsong uă bơh càr Gia Lai dê. Mìng tàm 6 nhai bồ nam 2026, Anih tờm Drơng broă sră pơ àr gơnoar ătbồ dà lơgar sàh dê neh dờp mờr 4 rbô 800 sră nggal. Geh tơngai, sàh Ia Hrung gơtìp tơngkah tài khà sră nggal lơyài tơngai hơ pơrgon uă. Bulah bè hơ̆, tơnơ̆ 2 nhai ngui AI, bơta neh gơ tam gơl loh làng. Khà sră nggal lơyài tơngai hơ pơrgon gơmù rlau 62%- khà jơnhoa ngan rlau jơh tàm jơh gùt càr. Sàh Ia Hrung là dùl tàm 10 sàh, sơnah ƀòn geh Anih duh broă Làng bol càr Gia Lai jờng rơ tài ngui geh cồng nha phan ngui AI ù tiah. Mò Huỳnh Ngô Tùng Điệp, Phó Chủ tịch Anih duh broă Làng bol sàh Ia Hrung, pà gĭt:

 "Cồng nha broă ngui AI kơnờm uă ngan tàm ală jơnau yal mờ ală rơndăp tăp sèng bơta chài lơh broă. Anih duh broă Làng bol sàh kung sồr kwang bàng, kông cưk ngui geh cồng nha phan ngui măy mŏk do. Bulah bè hơ̆, jơh ală ndrờm pal geh sền swì, sền nền wơl; kơnòl lồi dŭt kung gam gơ wèt mờ kwang bàng dong broă mờ cau geh gơnăp gơnoar bơsong sră nggal sră pơ àr gơnoar ătbồ”.

Tơnơ̆ tŭ lơh jăt tơmŭt bal mpồl lơh broă sră pơ àr gơnoar ătbồ, khà sră nggal ù tiah tàm kâp sàh tàm Gia Lai gơguh pràn tàm tŭ cau lơh broă ờ hềt tơl. Bơh jơnau sồr bơh Chủ tịch Anih duh broă Làng bol càr Gia Lai dê, Anih tờm Drơng broă sră pơ àr gơnoar ătbồ dà lơgar càr dê neh pơgồp bal mờ Cơldŭ lơh broă Lơh sră ù tiah să tờm tơn lơh gơs phan ngui AI ù tiah. Tàm uă nhai, mpồl cau lơh broă măy mŏk yal tơnggĭt jơnau mờ kwang bàng mờng lơh broă “pơlam tàp” bal AI tàm anih ChatGPT bơh ală sră nggal kơrnoăt boh lam, broă pơlam bơta chài lơh broă, mờ gĭt nđờ jơ̆t rbô sră nggal ù tiah neh geh lơh bơsong tàm mùl màl.

Bồ nhai 6 nam 2026, phan ngui sơnđờm geh ai tơmŭt ngui mờ tŭ do neh lam lơh dồ ròt tàm 135 sàh, sơnah ƀòn tàm jơh gùt càr, dong kờl lơh bơsong pơgăp 80% ală sră nggal sră pơ àr gơnoar ătbồ ù tiah ờs mờng. Ală cồng nha bơh chờm tàm Gia Lai pà gŏ, bồ tơngoh jak kòn bơnus dê lơh gơlik (AI) ờ ala kwang bàng, mờ là phan ngui nàng mpồl ală cau kwang bàng lơh broă geh cồng nha rlau. Bơh dồ phan ngui drơng lơh bơsong sră nggal ù tiah, broă lơh tơrlòng lài AI bơh Gia Lai dê lơh is gam pờ gơlik broă lơh pa tàm lơh tam gơl pa wơl sră pơ àr gơnoar ătbồ, pơgồp bơnah tơngguh uă bơta niam drơng broă làng bol mờ mpồl lơh sa kă bro tàm ƀòn lơgar in.