Jơnau lơh nền tàm pơrjum đơs nền, ù tiah là phan kuơ geh is is ồn dà lơgar dê, là ù tiah ơm kis mờ bơtàu tơnguh; là bơta rơndap tap sèng gơ gơs gơnoar tờm kơnhoàl ù tiah, gơnoar tờm lơh sa mờ lơngăp lơngai dà lơgar; là phan bơna lơh sa is ồn, là bơta pràn kuơmàng ngan tàm bơtàu tơnguh dà lơgar. Ù tiah gơ wèt gơnoar ngui jơh gùt làng bol bơh Dà lơgar là ala mat tờm atbồ mờ ring bal atbồ; ờ gŏ di tam gơl gơ gơs phan nă să is bè ù tiah mờ ờ ai gơnoar cau lơgar ndai dờp tac bro ù tàm tơl bơta lơi.

Dà lơgar lam lơh gơnoar bơh ala mat cau tờm atbồ dê bơh broă lơh nền rơndap ù tiah, broă rơndap lơh ngui ù; ai wơl ù, jàu ù, ai ơpah ù, dờp gơnoar ngui ù, ai gơnoar tam gơl jơnau kờñ ngui ù mờ cih tŭ tơngai ngui ù; lơh nền giă ù… Gơnoar ngui ù, phan bơna gơ jat bal mờ ù geh adat boh lam sền gàr.

Bè jơnau kờñ mùl màl, Jơnau lơh nền tàm pơrjum đơs sùm, bơt bơtàu Anih yal jơnau tơnggit dà lơgar bè ù tiah jat gùng dà tơrgùm, ring bal, ndrờm bal, pa, uă jơnau kờñ; gàr niam tàm tơrbŏ bal, tam pà jơnau yal tơnggit mờ anih yal tơnggit jơnau dà lơgar bè làng bol ơm kis, dia. Tus jơh nam 2026, lơh gơs bơt bơtàu anih yal tơnggit jơnau gơ wèt mờ jơh ală bă ù neh geh tơrgùm jơnau tơnggit. Lơh ngan tus jơh nam 2027, lơh gơs broă đo was, lơh sră wac rùp ù tiah, lơh sră nggal ù tiah mờ bơt bơtàu anih yal tơnggit jơnau ù tiah gơ wèt mờ bă ù ờ hềt geh tàm anih yal tơnggit jơnau.

Bè tơm wơl, dong kờl, rơndap ƀòn ơm kis pa, ai wơl ù, jơnau lơh nền tàm pơrjum sồr cih loh rlau bă tiah ai wơl ù tàm bơta pal geh ngan tài jơnau kờñ ling klàng, lơngap lơngai, bơtàu tơnguh lơh sa mpồl bơtiàn, tài bơta kuơ dà lơgar, mpồl bơtiàn. Tam gơl pràn bơh bồ tơngoh kơlôi “tơm wơl phan bơna gơtìp ai wơl” gơ gơs bồ tơngoh kơlôi “bơt bơtàu wơl rài kis làng bol in tŭ Dà lơgar ai wơl ù”. Ală rơndap broă lơh ƀòn ơm kis pa pal gàr tơl phan bơna, broă drơng ala, sền gròi tus broă lơh sa làng bol. Lơh jat mùl màl jơnau pal jat cau geh ù gơtìp ai wơl pal geh anih ơm, ală bơta drơng rài kis in ndrờm halà niam rlau tiah ơm yau.

Dà lơgar đơng lam, gròi sền mờ lơh nền giă ù tŭ ờ hềt ai ngui, ờ lời lơh gơs gùng dà uă giă. Giă ù bơh Dà lơgar lơh nền jat tàm jơnau kờñ bơtàu tơnguh bơh tơl tŭ tơngai dê, gàr niam chồl tơnguh bơtàu tơnguh lơh sa - mpồl bơtiàn. Dà lơgar ai lơh jat ƀàng cih giă ù, khà sồ tam gơl giă ù, khà ai priă ngui ù, priă ơpah ù, khà tơm wơl dipal mờ bơta mùl màl, jat tơl bơta ù nàng gàr bơta ring bal, loh làng, song dơpă, bơnĕ bơnài đah bơta kuơ dà lơgar, làng bol, cau bơcri priă.

Bè lam lơh jat, Jơnau lơh nền tàm pơrjum jàu kơnòl broă mùl màl jat nùs nhơm loh cau, loh broă, loh kơnòl ai ală anih lơh broă Dà lơgar, ƀộ, gah broă lơh dà lơgar, ƀòn lơgar in tàm broă cih gơs kơrnuat boh lam mờ lam lơh jat Jơnau lơh nền tàm pơrjum, is ồn là kơnòl broă tam gơl, bơtơl Adat Ù tiah mờ ală adat geh gơ rềng, gàr bơta ndrờm bal, ring bal mờ di tŭ.