Kal ke dờng ngan tŭ do geh tàm broă hòi jà mờ gàr jơng ƀăk sìh lơh broă tàm ală tiah ngài, tiah làng bol jơi bơtiàn ờ gal cau tài broă dong kờl ờ hềt tơl pràn mờ bơta phan lơh broă gam ờ tơl. Gùt càr geh 135 hìu sơnơm sàh, sơnah ƀòn mờ 369 hìu geh lơh ing tàm ƀòn, bŭ lah 100% hìu sơnơm sàh sơnah ƀòn neh geh ƀák sìh lơh broă, mơya mùl màl càr kung gam ờ tơl mờr 500 nă cau lơh broă. Bơdìh hơ̆ tai, broă lơh gơnoar atbồ ƀòn lơgar bàr kấp neh lơh Anih duh broă Làng bol kấp sàh ờ git kwi kwơ tàm broă atbồ broă lơh, ờ git tàm broă pơrlòng blơi sơnơm kung bè broă lơh tàm hìu sơnơm sàh sơnah ƀòn bè dùl mpồl lơh broă krơi is dê.

Tềng đăp mờ ală bơta mùl màl do, tàm dơ̆ lơh broă pa do mờ Mpồl jăt sền mìng dùl tơngu me broă lơh bơh Anih duh broă Làng bol kơ̆p kờñ bơh Quốc hội dê, Anih duh broă Làng bol càr Gia Lai neh dan Dà lơgar gờñ tơlik jơnau bơto sồr ring bal bè anih lơh broă, khà cau lơh broă di jăt mờ bơta gal bơh khà kờp làng bol dê bal mờ bơta krơi is tàm ƀòn lơgar; mờ dong kờl priă bơcri ndrờm bal blơi phan bơna, phan lơh broă ai hìu sơnơm sàh sơnah ƀòn in. Đơs loh tus mờ bơta krơi is bal mờ ală jơnau kơlôi rơcang bơh càr dê, mò Nguyễn Thị Thanh Lịch, Phó Chủ tịch Anih duh broă Làng bol càr Gia Lai pà git: “Càr ai geh uă ngan broă dong kờl bè jơnau hòi jà, mơya gơlơh bè ờ geh ƀăk sìh tus lơh broă. Tus tàm hìu sơnơm sàh sơnah ƀòn, tus tàm hìu sơnơm dờng rơlao kung neh kal ke bloh, gam tus tàm sàh den ƀăk sìh ờ rê. Tŭ do, khà priă hòi jà cau lơh broă uă ngan bơh bol añ dê là 600 tơlăk đong tàm 1 nă ƀăk sìh mờ dong kờl priă ơpah hìu. Bol añ neh lơh broă rơndăp lơh nàng ntrờn, ai ntrờn tus. Tài di lah ai tus mờ ờ geh phan lơh broă, ờ lơh broă den hoàc huơr khà cau lơh broă ngan, tàm tŭ tàm hìu sơnơm dờng rơlao, bol añ gam ờ tơl uă ngan”.

Đơs niam jơnau đơs song dơ pă bơh càr Gia Lai dê tàm bơta sền bal ală broă lơh gam ờ pràn, Mpồl jăt sền dờp càr Gia Lai là dùl tàm ală càr lam lài tàm broă lơh geh ală jơnau lơh nền nàng hòi jà ƀăk sìh. Mơya, Mpồl kung sồr tơnkah càr pal tơnguh uă bơta niam tiah lơh broă, bơ̆t bơtàu tơngai gơguh groăt mờ bơto tơnơ̆ mờ đại học nàng ală ƀăk sìh iang nùs lơh broă jŏ jòng. Mò Trần Thị Nhị Hà, Phó Chủ nhiệm Anih duh broă Làng bol kơ̆p kờñ bơh Quốc hội, mờ kung là Kwang lam bồ mpồl jăt sền đơs nền: “Càr Gia Lai kờñ geh kơrnoăt lơi, broă dong kờl lơi tơl pràn nàng bơsong ală kal ke, càr dan tĕ. Mpồl jăt sền rơ̆p kơlôi sơnơng tơl ală bơta mờ di pal nàng geh bơsong kal ke bal. Jơh ală ndrờm wèt tus làng bol, lơh bè lơi nàng làng bol mùl màl dờp geh ală broă dong kờl mờ ală kwang bàng đơng lam Đảng, Dà lơgar gam kơ̆p gơn mờ kơ̆p kờñ”.

Broă ring bal mờ iăt bơh Quốc hội rơ̆p là bơta pràn kwơ màng nàng càr Gia Lai rơhời bơsong “gơkòl” cau lơh broă, tơnguh bơta pràn lơh sơnơm tàm sàh, di pal mờ jơnau kơ̆p gơn bơh làng bol kis tàm tiah brê bơnơm dờng Tây Nguyên dê.