Tơnơ̆ mờ uă nam jòi, ƀồc ntìng cau chơ̆t màng Y Chông Triêk neh geh tơrgùm mờ tơ̆p tàm ƀlàng tơ̆p ƀồc cau Ling chơ̆t màng sàh Liên Sơn Lăk, càr Dăk Lăk di tàm dơ̆ tơnkah ngai 27 nhai 7 nam do. Hơ̆ là cồng nha bơh Dơ̆ rê tơnơ̆ mờ rơlao 50 nam phi să ờ mìng lơh gơs jăt jơnau kơ̆p gơn bơh ală cau ling tàm mpồl bal dê mờ gam dong kờl cau tàm hìu nhă jơh nùs nhơm kơ̆p gơn sùm. Lŏ H’ Wai Triêk, oh ùr cau ling chơ̆t màng pà git, bơh tŭ do Ngai cau ling sồt să - Cau chơ̆t màng ngai 27 nhai 7 pah nam rơ̆p là ngai duh kah bi dê. “Tơngai jòi bi bơh bol añ dê tŭ do neh jơh, iang nùs tŭ bơyai lơh duh kah, satềp den oh kòn, kòn sao neh git ƀlàng tơ̆p, bơtô ƀồc geh cih măt Y Chông Triêk là niam bloh”.

Jơnau pơrài nùs nhơm hìu nhă lŏ H’ Wai Triêk dê là cồng nha niam bơh dùl dơ̆ jòi neh rơlao 50 nam, mờ bơta tờm là “Broă lơh dờng 500 ngai mang” dê.

Mò Võ Thị Hồng, tàm sơnah ƀòn Ea Kao, càr Dăk Lăk geh bi klao phi să tàm tiah tam lơh B2 nam 1972. Uă nam do, geh bal lŏ ùr, geh bal kòn, geh bal lŏ kơnòm neh uă dơ̆ lòt jòi. Bơh càr Tây Ninh tus mờ ală càr tàm tiah đah Jum măt tơngai Mŭt, hơ̆ sồng rê mờ mpàng tê gời. Lơh jăt “Broă lơh dờng 500 ngai mang”, mò neh ai mẫu ADN bơh să tờm dê, mờ nùs nhơm pin dờn là rơ̆p geh ngai jòi gŏ bi klao. “Uă nam sồr ală oh kòn, kòn sao lòt jòi lơh ală ƀlàng tơ̆p ƀồc tàm tiah Tây Ninh, tŭ do gam kơ̆p bơh dơ̆ lòt ai mẫu ADN añ kơ̆p gơn ngan. Añ kơno cau yal tàm tiah đah Jum măt tơngai Mŭt jòi gŏ uă ƀồc ntìng cau ling chơ̆t màng ngan, den tàng añ kơ̆p gơn ngan, bŭ lah gờñ ha là jơla añ kung kơ̆p gơn jòi gŏ bi añ”.

Kung ndrờm bè hơ̆ sơl, ồng Phan Đức Nhuận, tàm sơnah ƀòn Thành Nhất kung neh uă dơ̆ tus tàm ală càr đah Jum dà lơgar nàng jòi oh klao là cau ling chơ̆t màng Phan Đức Thắng. geh dơ̆ mìng tài gŏ tàm internet mpồl bơtiàn gŏ bơtô ƀồc geh măt sơnđan ndrờm bal, den ồng lòt sền mơ. Jơnau kơ̆p gơn ờ geh mùl màl. Mơya tàm dơ̆ do den is. Ồng pin dờn bơta jăk chài rơ̆p dong kờl cau gam kis lơh gơs jơnau kơ̆p kờñ mờ cau neh roh. “Tŭ do mè bèp jơh chơ̆t bloh, oh mi kung neh kra sơl. Gùng dà broă lơh do lơh làng bol bal mờ wa ngoh rơngăc ngan. Do geh sền bè là dơ̆ tam lơh dŭt ndơl tàm broă jòi cau ling chơ̆t màng. Dơ̆ do geh jơnau kơ̆p gơn tài geh mŭt tàm broă lơh broă mờ măi mok pa”.

Tàm “Broă lơh dờng 500 ngai mang”, càr Dăk Lăk ai jơnau kờñ geh jòi rồ, tơrgùm 270 ƀồc ntìng cau ling chơ̆t màng. Mìng is tàm nam 2026 do lơh ngan jòi geh 180 ƀồc ntìng cau ling chơ̆t màng, mờ lơh gơs broă ai mẫu ADN gơwèt mờ 4 rơbô 19 bơtô ƀồc ờ hềt git đal măt tàm 33 ƀlàng tơ̆p ƀồc.

Tơnơ̆ mờ ală jơnau kờñ do là git nđờ rơbô jơnau yal tơngit geh sền wơl, git nđờ rơbô dơ̆ lòt rê tàm ală sàh mờ git nđờ rơbô bơtô ƀồc geh nền nòn pờ. Đại tá Ksor Lành, Phó Chính ủy Gah Đơng lam Ling klàng càr Dăk Lăk pà git, Mpồl Đơgn lam Ling klàng gam hòi jà mpồl lơh broă tàm khà uă ngan. Mpồl K51 geh tam pà gơs 8 mpồl tus tơn tàm ală tiah, pơgồp bal mờ gơnoar atbồ sàh nàng sền, đal git, jòi mờ tơrgùm ƀồc ntìng cau ling chơ̆t màng; mờ lơh gơs 6 mpồl mìng lơh dùl kơnòl broă ai mẫu tàm ală ƀlàng tơ̆p ƀồc nàng drơng tàm broă đal git ADN. Bal mờ hơ̆ là broă pơgồp bal bơh mpồl kwang àng tàm broă tơrgùm mẫu ADN cau pròc mhàm cau ling chơ̆t màng mờ gah Lơh broă dơlam is tàm broă sền wơl, lơh di pal jơnau tơngit ƀlàng tơ̆p ƀồc, bơtô ƀồc cau ling chơ̆t màng in. “Tŭ do bol añ neh geh 6 rơbô jơnau yal tơngit cau ling chơ̆t màng. Bol añ pal sền sơwì pang sră nàng pơyoa tus ală mpồl lơh broă, ală cau mờ bol añ kung lơh sră lùp sền jơnau tơngit cau ling chơ̆t màng mờ màh QR, bơh tàm màh do, ală cau git bè jơnau yal tơngit ƀồc ntìng cau ling chơ̆t màng rơ̆p cih ală jơnau yal tơngit tàm hơ̆ mờ pơyoa, den rơ̆p geh tơrgùm tàm măi tờm bơh Mpồl Đơng lam ling klàng càr dê. Bơh gùng dà broă lơh do, broă bơyai lơh tơrgùm tàm tơngai tus rơ̆p geh cồng nha rơlao”.

Broă lơh dờng 500 ngai mang tàm càr Dăk Lăk neh geh ală cồng nha lài ngan tàm nam 2026: tơrgùm geh 19 ƀồc ntìng cau ling chơ̆t màng, tàm hơ̆ geh 12 ƀồc ntìng geh jòi gŏ tàm lơgar Campuchia mờ 7 ƀồc ntìng tàm càr. Rơlao 500 mẫu neh geh dờp nàng drơng tàm broă đal git ADN. Ồng Đào Mỹ, Phó Chủ tịch Anih duh broă Làng bol càr, Phó Lam bồ Mpồl sền, Mpồl sồr lơh “Broă lơh dờng 500 ngai mang jòi rồ, tơrgùm mờ đal git măt ƀồc ntìng cau ling chơ̆t màng” càr Dăk Lăk đơs nền, bŭ lah broă lơh ngai sơlơ kal ke tài tơngai neh jŏ, mơya càr rơ̆p hòi jà jơh ală bơta pràn, ală phan lơh broă bal mờ ală jơnau yal tơngit nàng pơn jăt tai jòi ală ƀồc ntìng cau ling gam tai. “Bol añ hòi jà jơh gùt mpồl lơh broă chính trị tus bal, mờ ală broă lơh pal dờp geh uă jơnau yal tơngit ngan, lơh jăt tàm ală tiah, ngui ală bơta phan nàng jòi pal geh ƀồc ntìng cau ling chơ̆t màng gam tàm tiah ù”.

Tơl ƀồc cau ling chơ̆t màng geh jòi gŏ là geh tai dùl hìu nhă jơh jơnau kơ̆p gơn, geh tai dùl jơnau hơ mờ ală cau neh phi să geh lơh gơs. “Broă lơh dờng 500 ngai mang” ờ mìng là tơngai jòi mờ sră nggal, rài lài do mờ măi mok ADN, mờ gam là broă lơh bơh nùs nhơm niam, kơnòl bal mờ nùs nhơm git ưn ngài dê.