Bơh ală hìu ràng tăc phan ờs mờng bơh yau tus drà kă bro phan điện tử mờ internet mpồl bơtiàn, uă phan bơna ai pơrlồm măt Bar bèt chàng Khánh Hoà geh ràng tăc ờ ndơ̆p mpồn. Ờ mìng ngui măt hòi mờr ndrờm gơ̆p, ală cau do gam đòm kơldung, măt mờ logo nàng kờñ lơh pơrlồm cau ngui sa. Jăt Kông ty Yến sào (Bar bèt chàng) Khánh Hoà, tŭ do geh 122 mpồl lơh sa kă bro ngui tìs tềl tơnggŏ “Bar bèt chàng Khánh Hoà”; 42 mpồl lơh sa kă bro lơh sră cih măt kă bro phan mờ 55 sră dan lơh sră cih măt măt phan geh jơnau ndrờm bè măt kă bro neh geh sền gàr dong kờl sơl. Tàm anih internet kung geh pơgăp 280 măt Facebook mờ website geh tềl tơnggŏ ai pơrlồm măt.

Jăt ală cau gĭt wă jrô, tŭ phan ờ ngan tăc bềng, hoàc hươr ờ mìng gơ rê mờ mpồl lơh sa kă bro mờ gam lơh gơrềng tơn tus ală cau ròng bar bèt mờ ală anih lơh sa song niam. Cau ngui sa roh bơta pin dờn rơ̆p lơh pràn blơi gơmù, gơrềng tus priă jền phan bơna mờ jơnau tơl pràn pờ ơnàng drà kă bro. Ồng Trần Kiều Hưng, Lam bồ Ci Kụk Ătbồ drà kă bro càr Khánh Hoà pà gĭt, uă phan bơna lơh tìs đòm jăt gơlơh bè đòm jăt jơh bơh kơldung ơn, măt phan mờ geh tŭ cih wơl anih lơh sa ờ di mùl màl nàng lơh geh bơta pin dờn mờ năc blơi phan.

“Lơh tìs uă ngan tơrgùm ală khar “Bar bèt chàng Khánh Hoà”, do là tơrgùm ală akhar kông ty neh geh sền gàr dong kờl tàm jơh gùt lơgar. Pa do, bol hi gŏ uă ngan phan bơna lơh tìs, lơh gơlik tàm tiah ndai mơya kung gam cih sơl Bar bèt chàng Khánh Hoà. Geh ală phan bơna cih là cih anih lơh gơlik tàm Khánh Hoà mơya tŭ lòt sền anih hơ̆ ờ geh. Uă cau ngui sa là cau sền mờ cau gŏ Bar bèt chàng Khánh Hoà cau kơlôi tơn là bar bèt chàng tiah lơh gơlik tàm Khánh Hoà mờ bơh Kông ty Bar bèt chàng Khánh Hoà dê”.

Prau nhai bồ nam 2026, Kông ty Bar bèt chàng Khánh Hoà lơh gơlik rlau 130 tơlak phan bơna, geh priă kă bro mờr 1 rbô 700 tơmàn đong, lơh geh broă lơh broă sa ai mờr 3 rbô 900 nă cau lơh broă in. Ală khà do pà gŏ gah bar bèt chàng tă pơgồp uă ngan ai lơh sa ƀòn lơgar in. Nàng sền gàr gơnoar kwơ cau lơh sa in, Ci Kụk Ătbồ drà kă bro càr Khánh Hoà mờ Kông ty Bar bèt chàng Khánh Hoà neh kĭ hơ broă lơh pơgồp bal lòt sền, jăt sền drà kă bro, lơh glài broă lơh tìs sơgràm gơnoar geh ngui bồ tơngoh jak.