Tàm dar pơrjum do, Anih duh broă Lơh kơnòl Broă sùm Quốc hội neh sền sơwì, cri bơyai 45 tơngu me; tàm hơ̆, neh sền sơwì, pơgồp jơnau đơs mờ 28 tơngu me yal Quốc hội tàm Dar pơrjum ờ bè ờs dơ̆ Sơnrờp mờ 2 jơnau rơcang cih adăt boh lam tàm Dar pơrjum dơ̆ 2; ring bal 3 kơrnoăt sồr (hơ̆ là sră nggal adăt boh lam geh Quốc hội ring bal), 8 Jơnau lơh nền tàm pơrjum geh anih lơh broă geh gơnoar ai.

Chủ tịch Quốc hội sồr ală anih lơh broă pơn jăt tai tơrgùm lơh gơs broă pơyoa sră nggal mùl màl tus cau ala măt Quốc hội lài mờ dar pơrjum, nàng cau ala măt Quốc hội geh tơngai kơlôi sơnơng nền nòn lài mờ tŭ cri bơyai. Chủ tịch Quốc hội sồr tơnkah, ală anih lơh broă pal rơcang lài, jal mhar rơcang Dar pơrjum Quốc hội bè ờs dơ̆ 2 geh bơyai lơh tàm nhai 10 nam 2026, kờp dŭ khà kơnòl lơh adăt boh lam, jăt sền, ai ngui ală bơta kwơ màng tàm dar pơrjum do kung uă ngan; tềng đăp măt là pal gàr niam tơngai cih jơnau yal Anih duh broă Lơh kơnòl broă sùm Quốc hội tàm Dar pơrjum bè ờs nhai 8 mờ nhai 9 gơwèt mờ ală tơngu me neh geh kờp dŭ lài tàm Broă lơh Quý 3 nam 2026.