Bơh bồ nam tus tŭ do, bŭ lah Ƀlàng rơndeh par Liang Khàng (Liên Khương) pal ơm ing lơh broă nàng lơh ơnàng mờ niam wơl, nhơl chờ càr Lâm Đồng kung gam wă mờr 12 tơlăk dơ̆ năc, priă geh kờp dŭ rơlao 33 tơbô tơmàn đong. Ală khà hơ̆ pà gŏ bơta pràn hòi jà bơh ù tiah pa kung gam dờng ngan. Mơya, tơnơ̆ mờ ală khà gơguh lơh sa là dùl jơnau lùp ờ hềt geh jơnau hơ mblàng. Hơ̆ là lơh bè lơi nàng tơnguh bơta pràn bơh tiah bơnơm Dà Làc, brê dờng Dăk Nông mờ dà lềng tơlir Bình Thuận dê nàng duĭ jơng cau năc ơm uă ngai rơlao.

Sền gŏ dơ̆ niam tơnơ̆ mờ tơmŭt bal càr, uă công ty lơh broă lòt nhơl neh mhar lơh ală dơ̆ lòt nhơl tơbŏ bal tiah. Ƀùi drim sền măt tơngai lik tàm dà lềng Mũi Né - Ƀùi mho lòt jơng nhơl tàm ƀòn dờng tiah bơnơm Dà Làc – Ngai tơnơ̆ tai was kayak tàm tơnao dà Tà đùng. Dùl broă lơh gơlơh bè niam bơnĕ ngan, mơya tŭ at tê lơh, geh uă ngan mpồl lơh sa kă bro gơtìp “gơkòl” mờng ngan hơ̆ là gùng lòt. Ồng Hoàng Công Định, Kwang Lam bồ Công ty TNHH Kă bro phan mờ Lòt nhơl Dima Tour, pà git: “Bơta kwơ màng ngan là mhar bơtàu tơnguh phan bơna gùng lòt, di lah ờ kal ke ngan kờñ pơgồp bal geh ală dơ̆ lòt nhơl đah 3 tiah Mũi Né – Dà Làc – Dăk Nông dê. Gơl gùng lòt gam tìp uă ngan kal ke. Kung kơ̆p kờñ geh dùl gơl gùng lòt bơh Dăk Nông ai tus Dà Làc, Mũi Né di gơlan gơtùi bơtàu tơnguh mhar rơlao nàng lơh geh uă dơ̆ lòt nhơl mờ gơtùi lòt bơh 3 tus 5 ngai ai cau năc lòt nhơl in den di pal rơlao”.

Ờ mìng mpồl lơh sa kă bro, bơh cau năc lòt nhơl kung gŏ loh làng ngan ală koh gơl do. Bơh tàm ală tiah tgơtìp tơrlah ù, ală chàr đah đang jăt gah gùng gơtìp ù, lŭ tơnơ̆ mờ trồ mìu lơh broă lòt tàm gùng neh geh kơ̆p gơn là gơl gùng tơrbŏ bal niam đah dà lềng mờ bơnơm den gơs bơta kơlôi rơcang gơwèt mờ uă cau. Bồ nhai 7 pa do, tàm dơ̆ lòt bơh Phan Thiết guh tus Dà Làc mờ sơlơ̆u wơl jăt gùng 28, 55, 28B, lŏ Triệu Thị Hồng Phúc uă dơ̆ pal tơrmù khà jờl rơndeh lòt tềng đăp mờ ală tiah gơtìp tơrlah ù jăt gah gùng lòt: “Geh tus bơh 4, 5 tiah, trồ mìu he lòt là tìp mờ tơrlah ù tơn. Gŏ gơlơh ngòt ngan. Gam gùng đah do là gơtìp tơrlah jơh tơn bloh. Ù, lŭ rơdeh, bràs trồ mìu den tơrlah mơ. Ală gùng tàm tiah bơnơm, koèl kơh geh ờ uă tiah tơrlah den he pal tơrmù bơta jờl rơndeh lòt tàm ală tiah gơtìp tơrlah bơnơm nàng lơngăp lơngai, di lah sền den ngòt rơngơ̆t ngan. Gùng do trồ ngai lòt gơtùi, di lah trồ mìu den lòt ờ gơtùi ờ, ờ khin lòt ờ”.

Geh bal tơn tàm tiah tàm gùl Dà Làc, do là tiah geh sền là “plai nùs” bơh lòt nhơl càr Lâm Đồng dê, kung gam uă tiah gơlời lơh uă cau pơlai ngan. Tàm mờr jơh dùl nam do, broă lơh ồs đèng àng tàm koèl kơh Prenn, mpồng tờm lam gùng mŭt tàm Dà Làc jơh dùl gơl gùng jòng ờ lơh broă, trồ mang klam jơngo ngan. Tềng gah tơnao dà Xuân Hương, dùl rơndăp broă lơh dờng uă nam lời rùs gời, lơh geh rùp rài krơi is ngan gơwèt mờ jơnau kơ̆p gơn bè dùl tiah drà lòt nhơl pa dê.

Hơ̆ mìng là ală rùp rài ƀuơn gŏ ngan, bơta pal kơlôi ngan rơlao tai geh tàm bơh phan lòt nhơl dê. Dà Làc gal cau năc. Mơya cau năc den ngui dơ̆ priă jền ờ hềt uă. Ồng Nguyễn Văn Lộc, lài do Kwang Lam bồ Sờh Niam chài, Tàp pràn să jan mờ Lòt nhơl càr Lâm Đồng dê, tŭ do là Bí thư Đảng ủy sơnah ƀòn Xuân Hương – Dà Làc đơs ngan song dơ pă: “Tus Dà Làc trồ mang di tàm 9 jơ là rê bic, di lah lòt dùl dar hùc dà toh khoah nàñ là jơh. Den tàng khà ngui dơ̆ priă jền bơh cau năc lòt nhơl càr Lâm Đồng he dê là ờ uă. He tam gơl bồ tơngoh tŭ do lơh broă lòt nhơl ờ gơtùi kờp bồ cau tàm dùl nhai nđờ nă cau năc tus mờ càr Lâm Đồng. He mờng kờp tơrgùm nàng yal niam gơdê, mơya añ kơlôi là pal tam gơl tàm broă kơlôi sơnơng, sền mùl màl bơh lòt nhơl dê”.

Tus tŭ do, gùng dà broă bơtàu tơnguh phan lòt nhơl tơrbŏ bal tiah tơnơ̆ mờ tơmŭt bal càr mìng gam geh tàm pang sră; ală phan lòt nhơl pơgồp bal tiah bơnơm – brê dờng – tiah drà dà lềng mìng gam tàm bơta geh; ờ hềt lơh gơs loh làng ală gơl, mpồl phan krơi is geh bơta pràn tàm pơrlòng uă đah ală tiah dê. Ồng Hồ Văn Mười, Chủ tịc Anih duh broă Làng bol càr Lâm Đồng song dơ pă đơs: “He ai gah lòt nhơl là dùl tàm pe gah tờm bơh lơh sa dê tơnơ̆ mờ phan kwơ geh is tàm ù, năng lượng mờ lơh sa suơn sre măi mok pa. mơya añ gŏ là ờ hềt geh lơh ndrờm bal mờ ờ hềt geh bơyai lơh nền nòn bal, pơgồp bal mờ gơnoar atbồ, Sờh Niam chài, Tàp pràn să jan mờ Lòt nhơl, ală sàh, sơnah ƀòn nàng lơh geh bơta pràn ai gah lòt nhơl in”.

Tơmŭt bal neh pờ geh dùl ù tiah dờng ơnàng nàng bơtàu tơnguh pa, mơya gah lòt nhơl càr Lâm Đồng kờñ geh uă rơlao ală jơnau kơlôi sơnơng niam, ha là ală khà gơguh lơh sa. Mìng tŭ phan bơna geh tơrbŏ bal, phan lòt nhơl geh lơh pa, mờ ală tiah tus bal dùl broă lơh kwơ màng, gùng lòt sền ù tiah pa rơ̆p ờ mìng jòng rơlao, mờ gam tơl pràn nàng duĭ jơng cau năc lòt nhơl.