Đơs pơndŭt dơ̆ pơrjum, Tổng Bí thư, Chủ tịch lơgar đơs sùm, broă pồ tơl Mpồl Sồr lơh Dà lơgar dơ̆ do ờ mìng là broă tam gơl bè jàu kơnòl broă mờ jrô rlau là bơta tam gơl bè kơnòl broă tờm lơh broă nàng lơh di mờ jơnau sồr tàm tŭ tơngai pa. Ồng sồr, pơn jăt tai tam gơl pràn bơh ătbồ tơngai pơrgon lơh tus ătbồ broă pal geh cồng nha loh làng, tơl kơnòl broă pal gĭt nền loh broă kờñ pal bơsong, geh phan bơna dŭt ndơl, cau ngui, mờ lơh gơlik geh cồng nhai gơtùi đo kờp geh, sền swì lơh cơng gơtùi.

Tổng Bí thư, Chủ tịch lơgar kung đơs là, pal lơh gơlik geh bơta tam gơl jơh bơh lơh broă ƀươn tus lơh broă bơceh lơh, bơh lơh broă ngui bơta pràn tus lơh broă bồ tơngoh jak, tài bơh bol he ờ gơtùi bơtàu tơngguh mhar mờ kơnhăp jŏ dilah kung gam kơnờm uă ir tàm lơh broă ƀươn, lơh broă mờ tê, crăp ơn halà jòi lơh ală bơta ƀươn neh geh lài.