Tàm Hà Nội pa geh bơyai lơh Pơrjum Cribơyai broă mờ lơgar ndai dơ̆ 33 mờ tơngume “Lơh jat niam gơnoar lam lài mờ lơh jat kơnòl broă tờm, sùm sùm bơh lơh broă mờ lơgar ndai lơgar Việt Nam dê tàm rài pa”. Đơs tàm pơrjum, ồng Tô Lâm, Tổng Bí thư, Chủ tịch lơgar đơs sùm jơnau sồr lơh broă mờ lơgar ndai pal ngan ngồn lơh jat niam gơnoar lam lài tàm broă gàr kơ̆ tiah ring lơngai, kơ̆ kơl jăp mờ gơ jal uă ngan rlau jơh bơta pràn đah bơdìh ai bơtàu tơnguh dà lơgar in.

Tổng Bí thư, Chủ tịch lơgar sồr gah lơh broă mờ lơgar ndai pal rcang lài, ngăc ngar gĭt mờ tŭ tơngai niam, kờp dŭ lài di ngan ală gùng dà broă lơh nàng di tŭ tă pơgồp bal jơnau đơs ai Đảng mờ Dà lơgar in. Broă lơh lơh broă mờ lơgar ndai pal pơgồp bal niam mờ sền gàr dà lơgar, lơngăp lơngai mờ lơh sa, lơh geh 3 bơta tờm kơ̆ ngan drơng broă jơnau kờñ sền gàr Dà lơgar tờm bơh gờñ, bơh ngài. Bơdìh mờ hơ̆, ồng Tô Lâm sồr pơn jat tai tơnguh uă cồng nha lơh broă mờ lơgar ndai uă lơgar, rcang lài tă pơgồp jơh nùs tàm ală broă lơh tàm tiah do mờ ală lơgar. Broă tơnguh uă bơta pràn jak mpồl kwang bàng lơh broă mờ lơgar ndai “mơlà nùs nhơm lơh broă niam mơlà jak chài lơh broă” kung là kơnòl broă tờm nàng lơh geh jơnau sồr tơnguh gơnoar broă, bơngă pin dờn bơh Việt Nam dê tàm muh mat ală lơgar tàm tơngai tus.