Chính phủ sồr đơs jàu gơnăp gơnoar uă rlau tai ai tiah drà is ồn in. Sền Sră yal bơh Chính phủ dê, ồng Hoàng Thanh Tùng, Bộ trưởng Bộ Sền gàr adat boh lam đơs sùm, rơndăp broă lơh Adat Bơtàu tơnguh tiah drà geh lơh nàng kờñ lơh geh tơngume adat boh lam kơ̆ kơl jăp, tam gơl pràn mờ gơtùi lơh jăt ngan ngồn ai tơl bơta bơtàu tơnguh in. Jơnau kờñ tờm ngan là tă bơsong bơta gơ kòl bè kơrnoăt boh lam, phan bơna bơt bơtàu, bơta pràn mờ lam lơh jat; sơlơ tơnguh tai tam pà kấp, tam pà gơnoar nàng ai tơl bơta bơtàu tơnguh mhar mờ kơnhăp jŏ in.

Broă ai lơh jat adat là kờñ pal geh nàng lơh gơs kơrnoăt boh lam jơnau lơh nền, Jơnau lơh nền tàm pơrjum bơh Đảng dê; tàm pơr dờn, lơh gơs adăt ală kơrnoăt boh lam, broă dong kờl krơi is geh cih tàm ală Jơnau lơh nền tàm pơrjum geh gơrềng bơh Quốc hội dê neh geh bơta geh ngan sền sơ wì. Tŭ do ƀòn dờng Hồ Chí Minh mờ ală tiah drà dờng gam uă bơta gơ kòl bè rơndăp ù tiah, phan bơna bơt bơtàu, tam gơl pa bơceh lơh, bơto bơtê, lơh sơnơm, gàr tơl niam rài kis mpồl bơtiàn, atbồ mờ lơh bal kơnhoàl ù tiah, kờñ dùl adat boh lam kơ̆ kơl jăp, tơrgùm jơh mờ tơl pràn nàng lơh geh bơta gơn kơnờm bơtàu tơnguh pa.